Ný íslensk skyrtulína

SKYRTA er nýtt merki í íslenskri fatagerð sem sett var á laggirnar í haust. Saumað er eftir máli og annar fyrirtækið vart pöntunum. Á næstu vikum mun fyrsta línan líta dagsins ljós, SKYRTA Reykjavík

Viðtökurnar hafa verið frábærar. Við erum búin að framleiða yfir fimmtán hundruð sérsaumaðar skyrtur frá því við fórum af stað í ágúst á síðasta ári,“ segir Ólafur Tómas Guðbjartsson, einn eigenda Skyrtu.

„Á næstu vikum setjum við saman okkar fyrstu standard-línu sem mun heita Skyrta Reykjavík og byggjum hana á þeim sniðum sem hafa verið vinsælust hjá okkur. Verslanir hafa þegar sýnt áhuga á að selja línuna frá okkar, sem er mjög spennandi. Ég veit ekki til að þessi þjónusta bjóðist víða á Íslandi,“ bætir hann við.

Ólafur þekkir framleiðsluferlið í fataiðnaðinum vel eftir að hafa síðustu ár, rekið Prowler efh. fyrirtæki sem framleiðir bæði efni og fatnað. Hann segist jafnframt þekkja vandamálið að finna vel passandi skyrtu.

„Ég er nú bara meðalmaður í vexti með nokkra bjóra í mallanum en mér líður betur í sérsniðnu,“ segir hann sposkur. 

„Við þekkjum þennan markað vel og að margir eiga í erfiðleikum með að fá á sig skyrtu sem passar. Við ákváðum einnig strax að bjóða skyrtur úr hágæða efnum,“ útskýrir Ólafur, en hægt er að velja úr yfir fjögur hundruð efnum og úr yfir þúsund mismunandi samsetningum.

„Fólk hannar í raun sína eigin skyrtu með aðstoð hönnuðar og stílista. Við tökum mál og sniðið er síðan geymt. Þannig getur viðskiptavinurinn pantað nýja skyrtu þegar þarf. Eins förum við heim til fólks og tökum mál ef þess er óskað. Gæði og ending er okkur einnig mikið hjartans mál og til dæmis notum við 120 metra af þræði í okkar skyrtur meðan yfirleitt eru notaðir sjötíu til áttatíu metrar af þræði,“ útskýrir Ólafur.

Bækistöðvar Skyrtu eru á Klapparstíg 16 en nánar má forvitnast um Skyrtu á www.skyrta.is.