Gylfi Sigurðsson í súperliði Pepsi

„Pepsi hefur stillt upp fótboltaliði reglulega síðustu fimmtán ár eða svo. Við höfum aldrei haft þann möguleika áður að fá íslenskan leikmann í hópinn en Pepsi gaf leyfi til þess núna. Við höfðum samband við Gylfa Sigurðsson og hann tók vel í þessa hugmynd frá upphafi. Það er ótrúlega spennandi og skemmtilegt að vinna að svona herferð. Algjör forréttindi. Gylfi er algjör fagmaður, heill náungi og svakalega góð fyrirmynd,“ segir Jón Mikael Jónasson, vörumerkjastjóri Pepsi hjá Ölgerðinni.

Íslenski knattspyrnumaðurinn Gylfi Þór Sigurðsson hefur verið valinn í súperlið Pepsi með fótboltagoðunum Lionel Messi, Robin van Persie, Sergio Aguero, Jack Wilshire, David Luiz, Sergio Ramos, Juan Guillermo Cuadrado, Clint Dempsey, Tarik Elyounoussi, Maynor Figueroa, Mario Gomez, Vincent Kompany, Kemar Lawrence, Victor Moses, Peter Osaze Odemwingie, Oribe Peralta, Andriy Pyatov og Mohamed Salah. Þessi hópur myndar eitt magnaðasta og hæfileikaríkasta lið allra tíma að mati Pepsi og munu knattspyrnumenn hvetja aðdáendur um heim allan til að tileinka sér slagorðið „Live for Now“ á árinu 2014.

Súperliðið er afhjúpað í dag og er þessi afhjúpun einnig upphafið á spennandi viðburðum út árið sem eru hluti af Pepsi-fótboltaherferðinni 2014. Leikmennirnir munu meðal annars leika aðalhlutverkið í alþjóðlegri sjónvarpsauglýsingu sem afhjúpuð verður síðar á árinu.

„Gylfi fer í tökur á sjónvarpsauglýsingunni 3. febrúar og mun þá leika á móti þessum leikmönnum,“ segir Jón Mikael. Þá mun mynd af Gylfa einnig prýða Pepsi- og Pepsi Max-flöskur innan tíðar.

„Myndin af Gylfa verður á hálfs lítra og tveggja lítra flöskum sem fara í sölu strax eftir páska. Þá fer Pepsi-deildin hér heima líka að rúlla þannig að þetta helst allt í hendur. Við setjum kóða aftan á flöskumiðana sem fólk getur slegið inn í smáforrit í gegnum Facebook. Fólk fær að vita strax hvort það vinnur eða ekki og á möguleika á að vinna mikið af flottum fótboltatengdum vinningum,“ segir Jón Mikael.

„Gylfi verður líklegast bara á umbúðum á Íslandi og ég hef trú á því að sjónvarpsauglýsingin með honum verði keyrð meira og minna bara á Íslandi. Herferðin fer á fullt fljótlega eftir páska og samanstendur af sjónvarpsauglýsingu og margs konar markaðsefni fyrir fjölbreytta fjölmiðla og verslanir. Gylfi mun vera í aðalhlutverki, ásamt Lionel Messi, í herferðinni sem keyrð verður á Íslandi. Aðrir leikmenn sem verða í herferðinni á Íslandi eru Jack Wilshere, Sergio Aguero og David Luiz. Það mun allt snúast um fótbolta hjá okkur næsta sumar, eins og fleirum væntanlega. Pepsi-deildin og Gylfi Sigurðsson eru tengingar sem Pepsi og Ölgerðin eru ótrúlega stolt af og við ætlum okkur að gera íslenskri knattspyrnu og knattspyrnumönnum hátt undir höfði í sumar.“

Aðspurður um kostnað við herferðina segir Jón Mikael hana ekki kosta mikið meira en hefðbundna Pepsi-herferð.

„Ég get ekki gefið upp hvað Gylfi fær í sinn hlut en herferðin í sjálfu sér kostar ekki mikið meira en fótboltaherferðir sem Pepsi hefur verið með í gegnum tíðina.“

Gylfi vill ekki gefa upp hvað hann fær greitt fyrir herferðina en til dæmis má taka að Lionel Messi fékk tvær milljónir dollara, rúmlega 230 milljónir króna, fyrir herferð hjá sportvörumerkinu Adidas. Þá er stutt síðan söngkonan Beyonce landaði samningi við Pepsi og fékk fyrir það fimmtíu milljónir dollara, tæpa sex milljarða króna.

„Ég einbeiti mér bara að því að spila fótbolta. Þegar ég var yngri langaði mig að vera eins og þessir frægu leikmenn eins og Beckham sem voru alls staðar. Núna finnst mér þetta meira bara bónus. Mér finnst bara gaman að taka þátt í þessari herferð með þessu stórfyrirtæki. Þetta er frábær auglýsing fyrir sjálfan mig og íslenskan fótbolta. Fótboltalega séð gerir þetta ekkert fyrir ferilinn en vonandi kemur þetta Íslandi einhvern veginn á kortið fyrir einstaklinga úti í heimi sem þekkja ekki fótboltann þar,“ segir Gylfi.

Síðasta ár endaði með því að Gylfi var valinn Íþróttamaður ársins á Íslandi og árið byrjar með súperliði Pepsi. Hvernig leggst árið 2014 í Gylfa? 

„Árið leggst vel í mig fyrir utan þessi meiðsli sem ég lenti í í lok árs og ég hef verið að einbeita mér að að losna við. Tottenham er í ágætis málum í deildinni og við erum enn í Evrópukeppninni. Svo byrjar ný undankeppni með landsliðinu þannig að það er margt sem maður hlakkar til að takast á við. Meiðslin eru horfin núna og ég hef verið að æfa síðustu fjóra til fimm daga. Þetta er allt á réttri leið,“ segir Gylfi en næsti leikur liðs hans, Tottenham, er á sunnudag gegn Swansea. Tottenham er í sjötta sæti en Swansea í því þrettánda í ensku úrvalsdeildinni.

„Auðvitað vonast ég til þess að fá að spila á sunnudag en liðið er búið að vinna tvo til þrjá leiki í röð í deildinni og persónulega finnst mér að ætti ekki að breyta liðinu eftir þessa sigra. En ég vonast allavega til þess að vera í hópnum.“ 

Og þá liggur beinast við að spyrja Gylfa hvort hann sé sólginn í Pepsi.

„Já, ég er mikill Pepsi-maður.“