Leit að hefjast á ný að þýska ferðamanninum

Leit hefst aftur í birtingu  að þrítugum þýskum ferðamanni á Látrabjargi á Vestfjörðum og þar í kring, en síðast sást til hans á fimmtudag, þegar hann fór frá Hótelinu í  Breiðuvík.

Hann er einn á ferð og var á bílaleigubíl sem fannst mannlaus við Látrabjarg í gær. Björgunarsveitarmenn hófu þá leit og tók þyrla frá Landhelgisgæslunni þátt í henni, en án árangurs. Nú á að stækka leitarsvæðið og munu björgunarsveitarmenn úr öðrum landshlutum  koma heimamönnum til liðsauka í dag.

Lögreglu hafa ekki borist neinar vísbendingar um afdrif mannsins, sem heitir Christian Mathias Markus. Lögregla telur ekki að hvarf hans hafi borið að með saknæmum hætti.