Öllum unglingsstúlkum í Neskaupstað boðið frítt á sjálfstyrkingarnámskeið

„Mér finnst stelpur almennt þurfa að styrkja sjálfsmynd sína til að takast á við lífið og allar þær kröfur sem gerðar eru til stúlkna,“ segir Hildur Ýr Gísladóttir, námsráðgjafi í Neskaupstað, sem safnaði styrkjum til að kosta sjálfstyrkingarnámskeið fyrir allar 45 unglingsstúlkur bæjarins.

Hildur segist hafa fengið hugmyndina eftir að dóttir hennar komst ekki á námskeiðið Stelpur geta allt sem Kristín Tómasdóttir rithöfundur hélt á Austurlandi síðasta sumar.

„Ég fékk þá hugmynd að tala við Kristínu, athuga hvort hún gæti komið hingað og sækja um styrk til að allar stelpur á unglingasaldri gætu farið á þetta námskeið óháð fjárhag foreldranna,“ útskýrir Hildur sem kveðst hafa fengið aðra móður í lið með sér. Nú sé 150 þúsund króna styrkur frá Samvinnufélagi útgerðarmanna í Neskaupsstað í höfn, önnur eins upphæð frá Síldarvinnslunnni auk vilyrðis fyrir 50 þúsund krónum frá félagsmálanefnd Fjarðabyggðar.

Þegar þessir samtals 350 þúsund króna styrkir lágu fyrir segir Hildur að Kristín Tómasdóttir hafi í gær veitt 30 þúsund króna afslátt af námskeiðinu.

Þakklát fyrir styrkina

„Ég er ótrúlega ánægð og þakklát fyrir þessa styrki. Sjálf er ég aðkomumanneskja í Fjarðabyggð en get sagt að andinn hér einkennist af mikilli samstöðu. Þetta er eins og ein stór fjölskylda stundum,“ segir Hildur.

Að sögn Hildar hefur fyrirhugað námskeiðshald spurst út í bænum. Allir séu mjög áhugasamir, bæði stelpur og foreldrar. „Það hafa nokkrar mömmur komið til mín og sagt að ef eitthvað þyrfti að gera þá væru þær tilbúnar til að aðstoða,“ segir hún.

Námskeiðið er hugsað fyrir allar stúlkur í sjöunda til tíunda bekk grunnskólans. Skipta á þeim í tvo hópa þannig að eldri árgangarnir tveir verði saman og yngri árgangarnir saman. Hvor hópur um sig verði síðan á námskeiði þrjár klukkustundir á laugardegi og þrjá tíma á sunnudegi.

„Það hafa allir gott af að styrkja sjálfsmynd sína. Stelpurnar munu hittast í skólaeldhúsinu og elda saman mat, fá fræðslu og vinna verkefni. Það geta allir bætt sig en fyrst og fremst verður þetta skemmtilegt,“ segir Hildur Ýr Gísladóttir.