Harma uppsagnir í ráðuneytum

Stéttarfélag háskólamenntaðra starfsmanna Stjórnarráðs (FHSS) harmar þær uppsagnir á starfsfólki sem ráðist er í hjá ráðuneytum nú í lok janúarmánaðar. Þetta kemur fram í tilkynningu frá félaginu.

FHSS mótmælir því sérstaklega að lítið eða ekkert samráð hafi verið haft við félagið eða trúnaðarmenn þess við undirbúning og framkvæmd þessara aðgerða.

Eins og fram kom á Vísi fyrr í dag stóð til að segja upp hátt í 30 starfsmönnum ráðuneyta í dag.

Í tilkynningunni segir að að undirrót  uppsagnanna sé fyrirvaralaus ákvörðun sem tekin var við aðra umræðu um fjárlög ársins 2014 þess efnis að aðalskrifstofur ráðuneyta sæti 5 prósent aðhaldskröfu á fjárlagaárinu. Niðurskurðurinn hafi sérstaklega beinnst að launa- og rekstrarliðum ráðuneyta.

FHSS óttast að þessi ákvörðun ríkisstjórnarinnar og Alþingis muni hafa neikvæð áhrif á starfsanda og starfsemi í ráðuneytunum.

Starfsfólk Stjórnarráðsins gegni mikilvægu hlutverki gagnvart ríkisstjórninni og Alþingi. Því sé mikilvægt að skapa þau starfsskilyrði í Stjórnarráðinu að sérfræðingar vilji starfa þar og séu í stakk búnir til að takast á við krefjandi verkefni.

Ef Stjórnarráðið eig að geta keppt um hæft starfsfólk við stofnanir og fyrirtæki á markaði verði það að bjóða starfsmönnum samkeppnishæft starfs- og launaumhverfi og möguleika á starfsþróun og símenntun.

„Þá ber að nefna að opinberir starfsmenn, þar á meðal félagsmenn FHSS fengu ekki kjarabætur árið 2009 líkt og aðrir launþegar í landinu og hafa því 6 ára forskot á aðra launþega hvað varðar margumrætt aðhald í kjarasamningum,“ segir í tilkynningunni.

Að auki urðu starfsmenn Stjórnarráðsins fyrir sérstakri kjaraskerðingu vegna aðhaldsaðgerða sem kom til framkvæmdar 1. janúar 2010.