Füchse Berlin staðfestir viðræður við Erling

Leit Füchse Berlin að eftirmanni Dags Sigurðssonar heldur áfram en Bob Hanning, framkvæmdartjóri félagsins, hefur staðfest að Erlingur Richardsson sé einn þjálfaranna sem kemur til greina.

Erlingur er í dag þjálfari austurríska liðsins West Wien en Hanning segir að hann sé einn sextán þjálfara sem félagið hafi rætt við um að taka við þjálfun liðsins í sumar.

Dagur Sigurðsson tók fyrir tímabilið við þjálfun þýska landsliðsins og lætur af störfum með Füchse Berlin í sumar. Vísir greindi frá því í síðasta mánuði að Erlingur kæmi til greina í starfið.

„Ég vil klára þetta mál áður en HM hefst í janúar, svo að vinna geti hafist við að vinna í leikmannamálum næsta tímabils,“ sagði Hanning í samtali við þýska fjölmiðla.

Spænski þjálfarinn Juan Carlos Pastor hefur hafnað starfinu þar sem að hann er samningsbundinn Pick Szeged í Ungverjalandi.

„Þetta er erfið ákvörðun,“ sagði Hanning og bætti við að hann leitaði ráða hjá Degi um ráðningarferlið.