Bráðdrepandi hræ af fuglum

Stórhættuleg eitrun getur myndast í heyi innpakkaðrar heyrúllu ef hræ af dýri slæðist með þegar heyið er bundið.

Fjórar hryssur drápust vegna eitrunar í heyi á bæ Lilju Pálmadóttur á Hofi í Skagafirði nú í janúar. Fjögur hross drápust, þar af þrjár hryssur, góðir reiðhestar, sem voru í eigu Lilju. Þetta er mikið áfall. Í samtali við fréttastofu kvaðst Lilja miður sín vegna atburðarins og baðst undan viðtali vegna málsins. Ólafur Dýrmundsson hjá Bændasamtökunum er sérfróður á þessu sviði.

Hvað er það sem gerist?

„Fyrst eftir að farið var að verka í rúllur var nokkuð um listería-sýkingu, eða Hvanneyrarveiki, votheysveiki kalla hana sumir; skepnur drápust úr því. Og töluvert algengt á fyrstu árunum. En það eru nú komin yfir 20 ár síðan þetta var og helgaðist af lélegri verkun á heyinu. Það var vandamál útaf fyrir sig en lagaðist þegar menn fóru að vefja rúllurnar vel, með að minnsta kosti sex vafningum. Þá er heyið gert loftþétt. En, þessi sérstöku vandamál með eitrun í rúllum, nokkur tilvik hafa komið upp og er talið að það sé vegna þess að hræ af fuglum lendir í heyinu. Sem pakkast með því. Ekkert súrefni kemst að, loftfirrt, og þá eru ákveðnar bakteríur sem þrífast við slíkar aðstæður. Sem geta þá gosið upp og eitrað út frá sér.“

Ólafur segir langalgengast að um sé að ræða hræ af fuglum en einnig getur verið um mýs að ræða. Varla rottur til sveita og inn til lands en þó geta verið þess dæmi. Um er að ræða hættulega sýkingu sem getur verið bráðdrepandi og gert útaf við hvaða dýr sem er. Sýkingin er í ætt við miltisbrand.