Unnið að því að koma til móts við foreldra í Grafarvogi

„Við fengum bréf frá foreldrafélaginu og fórum strax í að reyna að finna lausn á þessu máli,“ segir Kolbeinn Óttarsson Proppé, upplýsingafulltrúi Strætó. Fyrr í dag sagði Vísir frá því að foreldrar í Grafarvogi væru ósáttir með breytingar á leið 6 hjá Strætó, en breytingarnar hafa það í för með sér að ung börn þurfa að labba langa leið til þess að komast á æfingar hjá Fjölni.

„Við biðjumst velvirðingar á að hafa ekki svarað bréfinu, fyrir mistök var það ekki gert. Við hlustum alltaf á farþega okkar og fórum strax í að reyna að koma til móts við óskir foreldra. Sú vinna stendur ennþá yfir og við vinnum að farsælli lausn,“ segir Kolbeinn.

Olga Gísladóttir, formaður foreldrafélags Kelduskóla, segir foreldra barna í skólanum einnig hafa verið ósátta með að breytingarnar voru lítið auglýstar. „Við auglýstum þetta í vögnum okkar hálfum mánuði áður en breytingin tók gildi og á heimasíðu okkar,“ útskýrir Kolbeinn.

„Við viljum koma því á framfæri að leiðarkerfi er alltaf til endurskoðunar og við hlustum á farþega okkar. Þegar koma svona tilvik eins og þetta þá förum við strax í að finna lausnir,“ segir Kolbeinn.