Fengu leyfi fyrir hvalabjórnum

Umhverfis- og auðlindaráðherra heimilaði í gær sölu og dreifingu á Hvalabjór Brugghússins Steðja í Borgarfirði. Eiganda brugghússins er létt og segir að fyrirtækið hafi fengið mikla athygli erlendis.

Lagt var fram bann á halabjórnum á þeirri forsendu að framleiðslan á hvalamjöli, sem notað er við framleiðslu á bjórnum, uppfylli ekki skilyrði matvælalaga. Þessu mótmæltu eigendur Brugghússins Steðja og skutu málinu inn á borð ráðherra.

Úrskurður ráðherra er í því fólginn að Brugghús Steðja megi selja og dreifa Hvalabjórnum uns Umhverfis- og auðlindaráðuneytið hefur endanlega fjallað um stjórnsýslukæru brugghússins á hendur Heilbrigðiseftirliti Vesturlands.

Dagbjartur Arilíusson, eigandi brugghússins Steðja, er ánægður með niðurstöðuna.

„Við töldum öll leyfi vera í húsi og ekkert því til fyrirstöðu að geta sett hann á markaðinn. Svo náttúrulega komu einhverjar mótbárur en ég er feginn að við erum komnir yfir það. Við fengum okkur lögfræðing og töldum okkur vera að gera rétta hluti, sem hefur reynst vera raunin eins og staðan er í dag," segir Dagbjartur.

Hvalabjórinn verður fáanlegur á Þorra og er kominn í dreifingu í Vínbúðum landsins. Hvalabjórinn hefur verið mjög umdeildur og hlotið mikla fjölmiðlaumfjöllun víða um heim.

„Það er ekkert gaman að lenda í svona, hvað eigum við að segja, miklum ádeilum. Engu að síður hefur þetta verið ákveðin kynning fyrir okkur. Við erum orðin ansi þekkt brugghús í dag og höfum fengið fyrirspurnir víða að úr heiminum, til dæmis að koma á sýningar og kynna vörurnar okkar. Við tökum svo sem bara eitt skref í einu og sinnum íslenska markaðnum bara eins og við getum. Hann er númer eitt, tvö og þrjú," segir Dagbjartur Arilíusson.