INTSP í stað náttúrupassa!

Frumvarp um náttúrupassa verður að öllum líkindum lagt fram á vorþingi sem nú er hafið. Innheimta er áætluð á árinu 2015 en framkvæmdin öll virðist vera í lausu lofti. Oft höfum við orðið vitni að misviturlegum laga- og reglugerðarsetningum stjórnvalda síðustu ár. Nægir að benda á lög og reglugerðir um fjárfestingabankastarfsemi sem allir landsmenn vita hvernig endaði. Kostnaðarsöm eftirlitsstofnun mátti sín lítils þrátt fyrir góðan vilja í því máli. Lögin voru gölluð og eftirlitið eftir því á brauðfótum.

Í þessu náttúrupassamáli, á upplýsinga- og tölvuöld, þarf að hugsa út fyrir boxið. Í fyrirsögn greinarinnar er minnst á INTSP. INTSP stendur fyrir Iceland natur, tourist and safety pass. Þennan passa munu allir erlendir ferðamenn, sem heimsækja Ísland, sækja um á netinu. Framkvæmdin er einföld og þekkja flestir Íslendingar, sem til Bandaríkjanna hafa komið, hvernig það ferli er byggt upp (ESTA – Electronic System for Travel Authorization). Upplýsingarnar, sem geta með auðveldum hætti verið breytilegar (rafrænt), munu færa ferðaþjónustunni í landinu mikilvægar upplýsingar og verður auðvelt að nálgast viðkomandi ferðamenn með ýmsar þær kannanir sem gerðar eru hér á landi í gegnum þennan miðil. Rafrænt er hægt að sjá hvenær sem er hvort viðkomandi hafi slíkan passa eða ekki. Passinn verður tengdur rafrænt viðkomandi vegabréfi.

Viðurlög eiga að sjálfsögðu að vera fjárhagslega íþyngjandi og koma skýrt fram í umsóknarferlinu. Yfir háannatíma ferðaþjónustunnar í landinu er auðvelt og ekki kostnaðarsamt að aðilar á vegum stjórnvalda sæki helstu ferðamannastaði landsins heim og taki stikkprufur á dreifingu INTSP-passans.

Einföld aðgerð

En af hverju INTSP í stað náttúrupassa? Jú, fyrst og fremst vegna þess að þetta er einföld aðgerð. Hún er auðveld í eftirliti og mun skila verulegum fjárhæðum strax. Einnig má benda á það að slík rafræn innheimta snertir hvorki né íþyngir fyrirtækjum sem starfa við ferðamennsku hér á landi. Hugmynd INTSP gerir einnig ráð fyrir umbun fyrir útköll björgunarsveita landsins og Landhelgisgæslunnar. Passinn verður þannig hluti af öryggisþætti ferðamála í landinu.

Hingað sóttu landið, á síðasta ári, um 1.100.000 erlendir gestir. Það gefur með 80% nýtingu og 3.000 króna gjaldi rúma 2,5 milljarða (2,640.000.000) á einu ári. Þessari fjárhæð er hægt að skipta upp t.d. þannig að 20% (528.000.000) fari í framkvæmd passans og umsýslu honum tengda, 10% (264.000.000) fari í rannsóknir á ferðaþjónustunni í landinu, 10% (264.000.000) fari til björgunarsveitanna og Landhelgisgæslunnar eftir ákveðnu kerfi er tengist útköllum og 60% (1.584.000.000) til ferðamannastaða eftir sjóðsreglum þar um.

Það er ekki spurning að hugmyndir stjórnvalda um náttúrupassa eru á villigötum. Rafræn innheimta eins og hér hefur verið lýst í grófum dráttum er framtíðin. Við þurfum ekki að finna upp hjólið (ESTA). Kjörnir fulltrúar á þingi í ríkri samvinnu við ferðaþjónustuna í landinu þurfa að gyrða sig í brók og hrinda slíku þjóðþrifamáli í framkvæmd strax. Ýtum náttúrupassahugmyndinni, eins hún liggur fyrir þinginu í dag, út af borðinu.

Innleiðum frekar INTSP, rafrænan passa með mikla möguleika til góðra verka fyrir ferðaþjónustuna í landinu. Passa sem mun færa fjölmörgum ferðamannastöðum möguleika á öflugri uppbyggingu og styrkja öryggisþætti tengda ferðamennsku hér á landi svo um munar.