Óþolandi ástand - er ísskápurinn þinn líka tómur í lok mánaðarins?

Ellý Ármanns skrifar 28. mars 2014 11:12

„Ég held að þetta sé ástand á mörgum heimilum því launin bara duga ekki en ég kvarta ekki því ég á alltaf mat í kistunni og á yndislega fjölskyldu sem aðstoðar mig þegar ég þarf á að halda,“ segir Elísabet Sóley Stefánsdóttir 36 ára þriggja barna einstæð móðir sem birti mynd af ísskápnum sínum á Facebooksíðunni sinni þar sem hún spyr vini sína hvort ástandið sé svipað hjá þeim.

Svörin létu ekki á sér standa en margir viðurkenna að ísskápurinn þeirra er nánast tómur síðustu daga mánaðarins - alla mánuði ársins.

Óþolandi ástand

„Ég var 17 ára gömul þegar ég fór að búa. Ég hef aldrei upplifað svona eins og þetta hefur verið síðasta ár. Það að þurfa að elda úr nánast engu sem til er síðustu vikuna í mánuðinum þar sem peningarnir eru bara búnir. Þetta er óþolandi ástand.“

Innkoman dugar engan veginn

„Fyrir nokkrum árum síðan náði ég auðveldlega endum saman en í dag er staða mín sú sama. Ég á mín þrjú börn, bý í sömu íbúð og er með sömu innkomuna. Breytingin er einfaldlega sú að ég borga meira en helmingi meira af lánunum, matur, bensín og önnur nauðsynjavara er bara orðin miklu dýrari. Þannig dugar sama innkoman engan veginn út mánuðinn.„

Tók myndina í gríni - en þetta er háalvarlegt mál

„Ég tók þessa mynd af ísskápnum mínum í meira gríni en alvöru en eftir viðbrögð vina minna þá hvet ég fólk til að taka myndir af ísskápnum hjá sér og setja á samskiptamiðla, jafnvel að taka einnig „print screen“ af bankareikningnum , setja myndirnar á Facebook og senda ráðamönnum þjóðarinnar,“ segir Elísabet.

Þessa mynd birti Elísabet af ísskápnum sínum. Viðbrögðin létu ekki á sér standa.

Ansi mörg heimili föst í sömu aðstæðum

„Er þetta það sem við viljum bjóða börnum þessa lands? Það að ég sé að borga helmingi meira af húsnæðisláninu en árið 2006 þegar ég keypti íbúðina mína er augljóst dæmi sem flestir eru að takast á við. Því miður held ég að ansi mörg heimili þessa lands séu með tóma ísskápa. Hvernig eigum við Íslendingar að halda þetta út?“ spyr Elísabet áður en kvatt er.

Við hvetjum lesendur til að taka mynd af ísskápnum sínum í dag og senda okkur eða merkja myndina #visirlifid.

Mest lesið

Fleiri fréttir

Mest lesið

Fleiri fréttir

Mest lesið

Tarot dagsins