Sumarveisla FM Belfast

Í tilefni hækkandi sólar og útgáfu plötunnar Brighter Days, þriðju breiðskífu hljómsveitarinnar FM Belfast, hefur hljómsveitin ákveðið að blása til sumargleði í Mengi í dag frá klukkan fjögur til sex.

Sannkölluð sumarstemning verður í gangi en hópurinn SISTKINI sér um skemmtiatriði ásamt því að FM Belfast verða með þeytir skífum þar sem spiluð verða lög af nýju plötunni í bland við aðra slagara.

Í lok sumarhátíðarinnar verður frumsýnt glænýtt tónlistarmyndband við Brighter Days, titillag plötunnar en Magnús Leifsson leikstýrði myndbandinu.