"Lengi verið draumurinn að komast með litlu tá inn í þennan kvikmyndaheim”

Védís Hervör, tónlistarkona mun ljá bíómyndinni Shadows, lag sitt White Picket Fence en það er jafnframt hennar fyrsta smáskífa í langan tíma. Lagið kom út á síðasta ári við vinsældir hérlendra útvarpsstöðva og hefur nú ratað í hendur kvikmyndagerðarmanna vestanhafs.

Jaðarmyndin Shadows sem gefin var út 1959 verður nú endurgerð í höndum rússneska leikstjórans Makinov, en upprunalega myndin er hugarfóstur John Cassavettes og þótti mjög róttæk á sínum tíma. Hún fjallar um samskipti ólíkra kynþátta á tímum Beat kynslóðarinnar í New York.

„Þetta gerðist reyndar snemma á árinu og fór fljótt í einfaldan samning beint við framleiðslufyrirtækið. En eins og með allt annað í þessum bransa þá er ekkert gefið fyrr en ég heyri lagið óma í myndinni. En þetta er viðurkenning og hjálpar til við framhaldið og kynningu á laginu og ég hef lært að nýta mér allt slíkt til góðs. Ég hef verið í þessum lagasmíðabransa lengi og komið mörgu áleiðis sem ég er stolt af og þakklát fyrir alla brauðmolana, svo að segja, en þetta myndi toppa flest, hugsa ég. Lengi verið draumurinn að komast með litlu tá inn í þennan kvikmyndaheim.”

En hvernig kom þetta til? „Röð tilviljana þar sem færeyskur félagi minn lét pródúsent fá lagið og hún hitti kollega sinn á kvikmyndahátíðinni í Chicago sem fær lagið í hendurnar ásamt safni skandinavískra laga á kubbi. Heppnin mætti þarna góðri vinnu hljómsveitarinnar og lagið er svosum ekkert slor og passar greinilega inn í þema myndarinnar þannig að margt spilar saman. Svo er bara að þora að vona að myndin verði eilítið meira en Blockbuster á rykugri hillu” segir hún og hlær.

Hér má hlusta á White Picket Fence, en hljómsveit Védísar skipa einnig Ásgeir Ásgeirsson,Róbert Þórhallsson, Þorvaldur Þór Þorvaldsson og Þórhallur Bergmann. Geimsteinn ehf. mun gefa út næstu plötu Védísar sem er nú í vinnslu.