Sexí þokkagyðja

Fyrirsætan Hulda Lind Kristinsdóttir er hin kynþokkafulla Icebody. Hún segir besta fegrunarráðið að ímynda sér að maður sé flottastur af öllum.



Hvenær kviknaði tískuáhuginn?

Ég var fimm ára farin að máta föt fyrir framan spegil og stilla mér upp fyrir myndavélina.

Hvernig myndirðu lýsa eigin stíl?

Litríkur, þægilegur og sexí.

Hvaðan hefur þú tískuvitið?

Ég tel mig ekki hafa neitt sérstakt tískuvit en ég fylgist með straumum og stefnum og tileinka mér það sem heillar mig.

Áttu þér uppáhalds tískuverslanir?

Já, ég hef mest dálæti á Guess, Bebe, Kiss og Zara.

Eyðir þú miklu í fatakaup?

Nei, ég nýti mér verðlækkanir á góðum fatnaði.

Hver er þinn helsti veikleiki þegar kemur að tísku og útliti?

Ég á stundum erfitt með að velja á milli þess sem er í boði.

Ef þú mættir kaupa þér eitthvað eitt nýtt í dag, hvað yrði fyrir valinu?

Ég mundi velja mér ekta skart; fallegt, stórt og áberandi.

Hver er uppáhalds flíkin þín?

Svarti og hvíti kjóllinn sem ég keypti í Kiss er ein af mínum uppáhalds.

Hvaða litur klæðir þig best?

Bleikur er í uppáhaldi og finnst mér hann klæða mig ágætlega.

Hverju klæðistu við sparileg tilefni?

Ég fer oftast í það fallegasta sem ég finn í fataskápnum hverju sinni.

Ertu hrifin af skartgripum?

Já, mjög. Ég elska skartgripi og finnst eyrnalokkar alveg ómissandi.

Hvaða ilmvatn notar þú?

Um þessar mundir nota ég ilminn Dream Angels Heavenly frá Victoria's Secret.

Ef þú ættir aðeins einn hlut í snyrtibuddunni, hver væri hann?

Það væri maskari.

Hvað er það besta við sumartískuna?

Bjartir litir og léttur fatnaður.

Áttu þér tískufyrirmynd?

Ég elska að fylgjast með súpermódelinu Naomi Campbell sem er alltaf flott og ég fíla Nicki Minaj því hún klæðist skemmtilega litríkum fatnaði.

Hvað gerir allar konur kvenlegar?

Það kvenlegasta við konur eru brjóstin.



Lumarðu á góðu tísku- eða fegrunarráði?

Besta tískuráðið er að klæðast því sem maður fílar og besta fegrunarráðið að vera hreinn að innan sem utan og ímynda sér að maður sé flottastur af öllum.

Kjóll, pils eða buxur?

Buxur.

Einlitt eða munstrað?

Einlitt.

Háir hælar eða flatbotna?

Flatbotna skór eru bestir en háir hælar gera útslagið.



Í hvernig fatnaði líður þér best?

Mér líður best í þægilegum buxum og bol.