Evrópumeistari hætti í viðtali, tók lagið og hellti sér í glas | Myndband

Norska kvennalandsliðið í handbolta, undir stjórn Þóris Hergeirssonar, varð Evrópumeistari í gær eftir sigur á Spáni, 28-25, í úrslitaleik í Búdapest.

Eftir leikinn og verðlaunaafhendinguna hélt norska landsliðið mikla veislu þar sem sigrinum var fagnað og var þar eðlilega mikið fjör.

Fáir voru þó í meira stuði en Camilla Herrem, leikmaður norska liðsins, sem yfirgaf viðtal þegar hún heyrði lagið Tore Tang byrja að óma um salinn.

„Ég vil biðja alla hérna inni afsökunar að ég sé að syngja,“ sagði Herrem, en hún söng lagið af lífi og sál.

Hún tók meira að segja hljóðnemann af einum fréttamanninum og söng lagið í beinni útsendingu með kampavínsglas í hönd.