Notandi dásamar Uber en leigubílstjórar eru uggandi

Íslenskir leigubílstjórar ætla að berjast hart gegn innreið bandaríska fyrirtækisins Uber á íslenskan leigubílamarkað, eitt fyrirtæki er þó að nútímavæðast með appi.

Bandaríska hugbúnaðar- og leigubílafyrirtækið Uber er með til skoðunar að hefja rekstur á Íslandi en fyrirtækið hefur notið gríðarlegra vinsælda í Bandaríkjunum og víðar. Uber kemur í nokkrum flokkum en lægsti flokkurinn heimilar í raun hverjum sem er að taka farþega gegn greiðslu svo lengi sem viðkomandi hefur verið samþykktur af Uber. Viðskiptavinir Uber panta sér bíla með appi í símanum og geta séð á korti hvar bílarnir eru staðsettir.



Biðin eftir bíl er margfalt styttri en hjá venjulegum leigubílum og notendur geta stjórnað tónlistinni í bílunum á meðan á ferð stendur með því að tengjast hljóðkerfi bílsins gegnum Spotify.

Viðskiptavinurinn fær tölvupóst að lokinni ferð, eins og þessa hér frá Uber í París, með öllum upplýsingum og mynd af bílstjóranum auk korts með leiðinni sem var ekin.

Íslenskur leigubílamarkaður hefur lítið breyst á undanförnum áratugum, ef undan eru skildar nýjungar í greiðslumiðlun. Tvö fyrirtæki eru ráðandi á markaðnum, Hreyfill og BSR. Ljóst er að innkoma Uber inn á þennan markað myndi gjörbreyta honum og eflaust veita Hreyfli og BSR harða samkeppni.

Leigubílaakstur er leyfisskyld starfsemi og ljóst er að breyta þarf reglugerð um leigubílstjóra ef Uber á að geta hafið hér rekstur. Ástgeir Þorsteinsson er formaður Bandalags íslenskra leigubifreiðarstjóra.

„Samkeppni frá Uber er náttúrulega ekki samkvæmt lögum um leigubíla. Þetta er takmörkun hérna og það samræmist ekki að einhverjir einstaklingar geti fengið þetta. Það hefur gerst víða um heim að einstaklingar hafa notað þetta sem alls ekki eru með leyfi til atvinnureksturs á leigubíl. Það er bara þar sem málið stendur.“

Heldurðu að íslenskir leigubílstjórar muni nútímavæða þjónustuna sína, til dæmis með öppum fyrir snjallsíma til að mæta samkeppni?

„Já, eflaust. Það stendur til á einni stöð en það er ekki komið í gagnið. Ég veit ekki hvernig það verður.“

Ástgeir segir að bandalagið muni beita sér gegn innreið Uber á markaðinn.

„Ef ekki verða löglegir menn sem að fara að nota þetta að þá munum við að sjálfsögðu sporna gegn því. Menn eru að berjast gegn þessu víða um heim, til dæmis á Indlandi núna.“

Ástgeir er þarna að vísa til þess að stjórnvöld í Delhi á Indlandi bönnuðu Uber eftir að ásakanir voru settar fram á hendur bílstjóra að hafa nauðgað kvenkyns farþega.

Gunnar Hólmsteinn Guðmundsson, rekstrarstjóri Plain Vanilla og einn stofnenda hugbúnaðarfyrirtækisins Clara, bjó um þriggja ára skeiðí San Fransisco og var viðskiptavinur Uber.

„Ég bjó í San Fransisco í þrjú ár og fékk þá tækifæri til að nýta þessa þjónustu nánast á hverjum degi, oft í viku, og hún er ótrúlega góð. Maður sér á korti á símanum sínum hvað er langt í bílinn, maður þarf ekki að tala við einhverja móttökustöð sem hefur ekki hugmynd um hvar bílarnir eru. Þeir eru miklu kurteisari og gæta umferðarlaganna miklu betur. Greiðslurnar eru allar í gegnum símann þinn, þú þarft aldrei að taka upp veskið þegar þú ert á leiðinni út. Þannig að allt í allt er þessi reynsla mjög þægileg.“