Costco opnar verslun í Kauptúni

Bandaríski smásölurisinn Costco hyggst kaupa 14.000 fermetra verslunarhúsnæði í Kauptúni í Garðabæ og ætlar að opna verslun þar fyrir næstu jól. Frá þessu var greint í fréttum RÚV í kvöld.

Í sumar var sagt frá því að verslunarkeðjan hefði átt í viðræðum við yfirvöld í Reykjavík og Garðabæ, með það fyrir augun að opna verslun annað hvort í Kauptúni eða á Korputorgi.

Gunnar Einarsson, bæjarstjóri Garðabæjar, segir í samtali við fréttastofu að bærinn hafi heyrt af því í síðustu viku að verslunarkeðjan valdi Kauptún fram yfir Korputorg. Hann gerir ráð fyrir því að forsvarsmenn Costco komi að máli við bæjaryfirvöld Garðabæjar á næstunni til að ræða skipulagsmál í tengslum við opnun verslunarinnar.

„Þetta er gott ímynd bæjarins, hverfið sem er þarna fyrir ofan og vonandi allt höfuðborgarsvæði. Við vonumst til að þetta efli samkeppni og komi til með að lækka vöruverð til neytenda,“ segir Gunnar.

Fyrirhuguð opnun Costco hér á landi vakti mikla athygli í sumar, ekki síst vegna þess að Costco vildi fá að selja lyf og áfengi í verslunum sínum, auk þess að flytja inn ferskt kjöt frá Bandaríkjunum.

Slíkt er bannað með lögum og þarf fyrirtækið undanþágur fyrir slíku. Í því samhengi sagði Ragnheiður Elín Árnadóttir, iðnaðar-og viðskiptaráðherra, að ekki stæði til að veita Costco undanþágur umfram aðrar verslanir. Áður hafði Sigrún Magnúsdóttir, þingflokksformaður Framsóknarflokksins, lýst sig andsnúna því að Costco fengi að flytja inn erlent kjöt þar sem það gæti leitt til heilsuleysis.