Uppgjör í undirheimum: Ákærður fyrir hrottalega líkamsárás á Skeljagrandabróður

Ríkissaksóknari hefur gefið út ákæru á hendur Daníel Rafni Guðmundssyni fyrir stórfellda líkamsárás á Stefán Loga Sívarsson í Ystaseli þann 17. maí í fyrra.

Daníel er ákærður fyrir að hafa slegið og sparkað ítrekað í höfuð Stefáns og líkama. Notaði hann meðal annars til þess hafnaboltakylfu og hnúajárn.

Stefán rifbeinsbrotnaði, nefbrotnaði og kinnbeinsbrotnaði í árásinni. Þá missti hann fjórar framtennur í efri gómi. Að auki skarst hann illa í andliti, meðal annars í vör og á enni. Stefán fer fram á 5 milljónir króna í miskabætur auk 2 milljóna skaðabótagreiðslu vegna tannlæknakostnaðar.

Töldu að Stefán væri látinn

Málið vakti mikla athygli á sínum tíma og töldu íbúar í götunni sem komu að Stefáni eftir árásina að hann væri látinn. Íbúunum var mjög brugðið enda átti árásin sér stað um hábjartan dag og voru börn meðal annars vitni að henni.

Hópur manna hafði komið á nokkrum bílum að húsi við Ystasel til að jafna með einhverjum hætti sakir við fólk sem var þar innandyra. Flestir biðu úti í bíl á meðan aðrir fóru inn.

Inni kom til átaka á milli manna sem bárust svo út á götu þar sem gengið var hrottalega í skrokk á Stefáni Loga, en hann var einn aðkomumannanna.



Tildrög málsins voru þau að stúlka sem var á staðnum hafði nokkrum dögum áður greint frá því að einn aðkomumannanna hefði byrlað sér ólyfjan í partýi og nauðgað sér. Það var þó ekki sá sem varð fyrir árásinni.

Við þetta var sá sem stúlkan sakaði um nauðgun afar ósáttur og fékk hóp manna með sér í Ystasel til að útkljá málið.

Fréttablaðið greindi frá því á sínum tíma að allt væri á suðupunkti í undirheimunum vegna árásarinnar. Hermt var að hópur manna sem tengdist Stefáni hefði vígbúist og hygði á hefndir en lögreglan sagðist ekki sérstakan viðbúnað vegna þess.

Ákærði í málinu, Daníel Rafn, hlaut 2 og hálfs árs dóm í héraði árið 2010 fyrir stórfellda líkamsárás. Hæstiréttur sneri þeim þó við árið 2011 og sýknaði Daníel. Þá  er sá sem fyrir árásinni varð, Stefán Logi, margdæmdur ofbeldismaður. Hann hlaut til að mynda 6 ára fangelsisdóm í febrúar síðastliðnum í Stokkseyrarmálinu svokallaða.   

Uppfært kl. 15: Í upphaflegri útgáfu fréttarinnar var greint frá því að Daníel hefði verið dæmdur í 2 og hálfs árs fangelsi en þá láðist að greina frá því að hann var sýknaður í Hæstarétti. Það hefur nú verið leiðrétt.