Forstöðukona elliheimilis við Jón Gnarr: „Það ætti að drepa þig helvítið þitt!“

Grínistinn og fyrrum borgarstjórinn, Jón Gnarr, segir frá því á Facebook-síðu sinni að hinir sígildu gamanþættir Fóstbræður hafi verið afar umdeildir á sínum tíma. Jón segir að margir hafi hringt inn til Stöðvar 2 og sagt upp áskriftinni vegna þáttanna.

„Það er merkileg staðreynd að aldrei í sögu Stöðvar 2 hafa jafnmargir áskrifendur sagt upp áskrift sinni til að mótmæla dagskrárefni eins og þegar Fóstbræður voru sýndir. Eftir sýningu þáttar rigndi símtölum inn þar sem fólk hneykslaðist á þessum þáttum,“ segir hann.

Jón segir frá því að hann hafi ákveðið að mæta sjálfur upp í áskriftaver stöðvarinnar eftir að hinn frægi skets þar sem systkin velta fyrir sér hvort þau eigi að skjóta aldraðan föður sinn fór í loftið:

„Eftir að þátturinn með afanum var sýndur ákvað ég að mæta uppá Stöð 2 og taka nokkur af þessum símtölum,“ segir Jón og víkur orði sínu að einni tiltekinni konu:

„Ég talaði við mikið af mjög reiðu og sáru fólki og reyndi að útskýra. Þar á meðal eina konu sem sagðist vera forstöðukona á elliheimili í Reykjavík. Henni fannst sketsinn svo mikil óvirðing við gamalt fólk að hún hálfgrét í símann. Þegar hún komst að því hvern hún væri að tala við þá æpti hún: „Það ætti að drepa þig helvítið þitt!" Svo skellti hún á.“

Jón deildi frétt Vísis sem fjallaði um hlátursköst, en tilefni fréttarinnar er erindi Kristínar Einarsdóttur þjóðfræðings um húmor. Erindi Kristínar ber titilinn Hvað á að gera við afa? og er vísun í sketsinn fræga en umdeilda. Kristín segir þetta vera sitt uppáhaldsatriði úr Fóstbræðrum.

Í fréttinni eru myndbönd með frægum hlátursköstum birt, þar á meðal eitt frá Belgíu sem var afar vinsælt á sínum tíma. Jón fræðir Facebook-vini sína um uppruna þess atriðis, sem virðist vera úr spjallþætti, en er í raun leikið:

„Svo má benda á til gamans að fyrsta hláturskastið er leikið og atriðið allt og er úr belgískum gamanþáttum sem hétu In de Gloria.“

Hér að neðan má svo sjá sketsinn fræga.

Hér er síðan belgíska hláturskastið sem Jón þekkir upprunann á.