Fjármálaráðherra segir að tryggja þurfi kjör ræstingarfólks

Fjármálaráðherra segir að það sé lágmarkskrafa að lögvarin og samningsbundin  réttindi fólks séu virt, hvort sem það vinni beint hjá ríkinu eða í gegnum verktaka. Ábendingum um að réttindi séu brotin á fólki sem vinni fyrir ríkið, beri að taka alvarlega.

Helgi Hjörvar þingflokksformaður Samfylkingarinnar spurði Bjarna Benediktsson fjármálaráðherra í fyrirspurnartíma á Alþingi í morgun út í stöðu ræstingarfólks hjá ríkinu í ljósi frétta af högum þess í fjölmiðlum að undanförnu.

„Við hljótum að velta því fyrir okkur hvort við þurfum ekki að tryggja þeim sem hafa verið að vinna fyrir okkur hjá ríkinu mikilvæg störf, að þau haldi starfskjörum sínum þó að breytt sé skipulagi til dæmis með útboði,“ sagði Helgi.

Vísaði hann þarna til frétta af því að ræstingarfólk á Landsspítalanum teldi sig hlunnfarið eftir að verktaki tók við ræstingum á spítalanum. En í fréttum okkar í gær kom fram að 12 manns sjá nú um ræstingu á rúmlega 20 þúsund fermetrum á Landsspítalanum sem 34 starfsmenn sáu um áður.

„Það er ekki hægt að neita því að fréttir af þessu tiltekna máli sem háttvirtur þingmaður tekur hér til umfjöllunar vekja áhyggjur. Það er ekki hægt að komast hjá því að manni finnist að eitthvað hljóti að hafa farið verulega úrskeiðis þegar að þeir sem starfa fyrir stéttarfélög fá ekki aðgang til að tryggja réttindi félaga sinna,“ sagði fjármálaráðherra.

En starfsmanni Eflingar stéttarfélags var í gær meinað að sitja fund ræstingarfólks með yfirboðurum sínum þar sem fara átti yfir stöðuna. Bjarni sagði ræstingarnar hafa verið boðnar út í tíð fyrri ríkisstjórnar. Það breytti því hins vegar ekki að taka yrði skoðunar ef kjör starfsmanna hafi ekki verið tryggð í samningum.

„En ég treysti því að fjármála- og efnahagsráðherra hafi tæki til þess að tryggja það að sjálfsögð réttindi starfsfólks undirverktaka hjá Landsspítalanum séu virt af hálfu verktakans,“ sagði Helgi.

„Já, ég get tekið undir það að það er alger lágmarkskrafa að lögvarin rétindi fólks og samningsbundin réttindi fólks séu virt, algerlega óháð því hvort starfsmenn séu að starfa hjá ríkinu beint eða að sinna störfum hjá ríkinu fyrir hönd þeirra sem hafa tekið það að sér í verktöku. Það er alveg skýrt,“ sagði Bjarni Benediktsson á Alþingi í morgun.