Vígalegur í hlutverki lærisveins

Fyrsta stiklan úr sjónvarpsþáttunum A.D. er komin á netið en íslenski leikarinn Jóhannes Haukur Jóhannesson fer með eitt hlutverkanna í þáttunum.

Jóhannesi bregður tvisvar fyrir í stiklunni en þættirnir eru framleiddir af Mark Burnett og verða frumsýndir vestan hafs á næsta ári.

Í seríunni leikur Jóhannes lærisveininn Tómas og verður við tökur á seríunni í Marokkó fram í miðjan desember.

Í viðtali við Lífið á Vísi fyrir stuttu spjallaði Jóhannes um seríuna.

„Þessi sería einblínir á þá sem eftir voru eftir krossfestingu Jesú. Þarna eru þessir ellefu gæjar, við vitum hvað varð um Júdas, og nú þurfa þeir að díla við þetta. Rómverjarnir og Kaífas og félagar eru ekkert á leiðinni að láta þá sleppa og það er svolítið spennandi flóttamannaelement í þessu. Af þessum ellefu eru sex sem eru í aðalhlutverki og ég leik einn af þeim. Tómas, Matthew og Símon eru svolítið þríeyki í þessu og eru oft saman í einhverjum vandræðum.“