Füchse Berlin og Guif áfram þrátt fyrir töp

Dagur Sigurðsson og Kristján Andrésson komust báðir með lið sín inn í riðlakeppni EHF-bikarsins í handbolta í dag.

Füchse Berlin, sem Dagur stýrir, tapaði reyndar fyrir franska liðinu Nantes á útivelli, en Berlínarrefirnir fóru áfram á fleiri mörkum skoruðum á útivelli.

Fyrri leiknum lyktaði með sigri Füchse, 23-18, en lokatölur í seinni leiknum urðu 28-23, Nantes í vil.

Pavel Horak var markahæstur í liði Füchse í dag með sex mörk, en Svíinn Fredrik Petersen kom næstur með fimm.

Atli Ævar Ingólfsson skoraði þrjú mörk af línunni þegar Eskilstuna Guif, sem Kristján þjálfar, tapaði 26-23 fyrir spænska liðinu Bada Huesca. Markvörðurinn Aron Rafn Eðvarðsson leikur einnig með sænska liðinu.

Guif vann fyrri leikinn á heimavelli með átta mörkum, 32-24, og komst því nokkuð örugglega áfram.