Einn stærsti dagur ársins í Ríkinu

„Í fyrra komu 35.000 viðskiptavinir í verslanir ÁTVR þegar sala á jólabjórnum hófst. Til samanburðar voru 27.000 viðskiptavinir síðastliðinn föstudag,“ segir Sigrún Ósk Sigurðardóttir, aðstoðarforstjóri ÁTVR. Hún segir að fjöldi vörutegunda af jólabjór sé svipaður og í fyrra, eða í kringum 30 talsins.

Sala á jólabjór hefur aukist jafnt og þétt síðastliðin ár.

„Þetta er stýrist auðvitað svolítið af því sem að viðskiptavinurinn velur og svo hvaða framboð er af vörunni. Á meðan það er tiltölulega mikið framboð þá má búast við meiri sölu.“

Ef litið er á tölur um sölu jólabjórs fyrir tíu árum síðan seldust rúmlega 200.000 lítrar af jólabjór.

„Þarna árið 2004 var lítið framboð af vörunni. Árið 2010 seldust svo tæplega 360.000 lítrar og árið 2011 jókst salan svo mjög mikið þegar seldust um 500.000 lítrar. Framboðið er þá orðið meira, fleiri tegundir og meira magn. Í fyrra fór salan svo í fyrsta skipti yfir 600.000 lítra,“ segir Sigrún.

Sala hefst í öllum vínbúðum landsins í dag en ætti samkvæmt reglugerð að hefjast á morgun. Sigrún segir að óskað hafi verið eftir undanþágu frá reglunum svo sala gæti hafist á sama tíma alls staðar. Nokkrar vínbúðir úti á landi eru nefnilega lokaðar á laugardögum.

Ekki aðdáandi Tuborg Julebryg

„Mér finnst Tuborg Julebryg ekki góður en ég á mér nokkra aðra uppáhaldsjólabjóra,“ segir Unnur Tryggvadóttir Flóvenz, annar stofnenda Félags íslenskra bjóráhugakvenna. 

„Jólabjórinn frá Ölvisholti var í uppáhaldi í fyrra og hittifyrra. Hann bragðast eins og piparkökur. Svo kom líka í hittifyrra mjög góður bjór frá danska brugghúsinu Mikkeler sem heitir Hoppy Loving Christmas. Einstök jólabjór og Jólakaldi eru líka mjög góðir,“ segir Unnur aðspurð um sína uppáhaldsjólabjóra.