Fyrirtæki munu oftar lokka til sín fólk með eingreiðslum

Eingreiðslur í tengslum við ráðningar almennra stjórnenda eða sérfræðinga munu mögulega aukast hér á landi á næstu árum. Þetta er mat Andrésar Jónssonar almannatengils.

Andrés segist í samtali við Vísi vita nokkur dæmi þess sem bendi til að eingreiðslur (e. signing bonus) séu að verða algengari á markaðnum. „Ég veit um nokkur dæmi þess þar sem eingreiðslur hafa verið skoðaðar og beinlínis boðnar starfsfólki. Þá erum við ekki að tala um einhverja framkvæmdastjóra eða forstjóra heldur almenna stjórnendur og sérfræðinga.“

Andrés segir að þannig sé reynt að stela fólkinu yfir til annarra fyrirtækja, ekki bara með því að bjóða því hærri laun og betri tækifæri. „Þessar eingreiðslur hafa reynst góð leið til þess að fá fólk til þess að stökkva, að bjóða því nokkrar milljónir.“

Að sögn Andrésar hefur þetta mikið tíðkast í hugbúnaðargeiranum, markaðsgeiranum og hinum skapandi greinum. „Þetta eru geirar þar sem fyrirtæki eru að selja þekkingu og þar skiptir máli að fá til sín besta fólkið. Í hugbúnaðargeiranum er til dæmis hægt er að vera með forritara sem er góður og annan sem er mjög góður. Sá sem er mjög góður er kannski fimm til tíu sinnum verðmætari en sá sem er bara „góður“ því í skapandi vinnu er mælikvarðinn öðruvísi en víða annars staðar.“

Tilbúnir að borga vel fyrir góða þekkingu

Andrés segir okkur Íslendinga eiga margt mjög hæft fólk sem barist er um. „Ég þekki til eins besta grafíska hönnuðar landsins sem er núna að vinna fyrir Apple, Google, Dropbox og Airbnb og menn eru að sækja hann til Íslands þó að Bandaríkin sé með nóg af grafískum hönnuðum. Það er alveg ljóst að menn eru tilbúnir að borga vel fyrir góða þekkingu.“

Hæft starfsfólk er þó yfirleitt bæði vel launað og ánægt á sínum núverandi stað. Andrés segist hafa undanfarin tvö ár verið í stjórnendaráðningum meðfram öðrum störfum. „Það hefur reglulega komið fyrir að við höfum náð að freista einhvers til að skipta um starf og taka við starfi hjá einhverjum af mínum umbjóðendum. Þá hefur núverandi vinnuveitandi einfaldlega hækkað launin sem viðkomandi hafði og hann hætt við að færa sig á síðustu stundu sem er mjög hvimleitt fyrir þá sem eru að reyna að ráða til sín gott fólk. Þá hafa þessar eingreiðslur reynst gott vopn.“

Eftirsótt fólk mun geta selt sig æ hærra verði

Andrés bendir á að flestir séu þannig að þeir lifi frá mánuði til mánaðar. „Svo færðu allt í einu svona umtalsverða greiðslu. Það er eitthvað sem fáir geta boðið. Það er sálrænt, þú áttir ekki von á því, en svo er einhver sem býður þér tvær milljónir, fimm milljónir, tíu milljónir eða hvað það nú er sem þú færð til viðbótar á ríflegri hækkun launa.“

Andrés segir eingreiðslurnar oft hafa flýtt fyrir ákvörðuninni að skrifa undir og að fyrirtækin sem beiti þessu vopni álíti sem svo að þetta sé þess virði þar sem verkefnin sem um ræðir séu brýn. „Þetta gildir náttúrulega aðallega um fólk sem er að fara að sinna mjög mikilvægum verkefnum hjá viðkomandi fyrirtæki.“

Þrátt fyrir að útskrifuðum með háskólamenntun fjölgi stöðugt og fleiri séu um hvert starf í þekkingariðnaði þá segist Andrés spá því að eftirsótt fólk muni geta selt sig æ hærra verði á næstu árum. „Aukin tíðni eingreiðslna er skýrt merki um þá þróun.“