Flókinn veruleiki á bak við það þegar nemendur hætta í skóla

Haft var samband við alla þá sem hættu námi á vorönn og náms- og starfsráðgjafar skólanna mátu hver meginástæða væri fyrir brotthvarfi hvers og eins. Flestum hafði verið vikið úr skóla vegna slæmrar mætingar en þar að baki geta legið margvíslegar ástæður. Kristrún Birgisdóttir, sérfræðingur hjá ráðuneytingu, segir reglur skólanna þó ekki vera of strangar.

„Ég held ekki. Þær eru bara allt öðruvísi en í grunnskólanum. Þegar krakkar koma upp í framhaldsskóla þá koma þau úr umhverfi þar sem er hægt að hringja sig inn veikan og það er hægt að fara í frí með foreldrum til útlanda og annað og þetta er ekkert alls staðar hægt í framhaldsskólunum. Þau fá fjarvistir en viðmiðin eru samt það rúm að þau eiga að hafa svigrúm til þess að verða veik og fara til læknis og gera það sem þau þurfa að gera.“

Vandamálið liggi frekar í því að nemendur taki skólann og nám sitt ekki nægilega alvarlega.

„Ég held bara að það þurfi að brýna betur fyrir krökkum að skóli er vinna og það þarf að mæta í hann eins og vinnu.“

Magnús Þorkelsson skólameistari í Flensborgarskólanum í Hafnarfirði skrifar um þessar mundir doktorsritgerð um brottfall nemenda úr framhaldsskólum.



„Það er yfirleitt einhver flókinn veruleiki á bak við það þegar krakkar hætta vegna þess að þau eru rekin eða standa sig ekki nógu vel í náminu eða eitthvað slíkt. Miklu flóknari en menn gera sér grein fyrir og það er oft erfitt að komast inn í hann og finna út á hvað hann gengur.“



40% þeirra sem hættu í skóla á síðustu önn án þess að ljúka prófi voru yfir tvítugu en eins og fjallað hefur verið um í fréttum stendur nú til að takmarka aðgengi 25 ára og eldri inn í framhaldsskólana.



„Mér finnst þetta í raun og veru bara styðja það sem við erum að gera. Það er fjöldinn allur af námsúrræðum fyrir þá sem eru orðnir 25 ára og við þurfum bara að skoða hvort annað námsumhverfi henti ekki betur þessum hópi,“ segir Kristrún.