Sæstrengur gæti skilað áttfalt hærra orkuverði
Nýir samningar sem norsk orkufyrirtæki hafa gert við bresk stjórnvöld um sölu vindorku í Bretlandi benda til að gífurlegur hagnaður geti orðið af raforkusölu um sæstreng frá Íslandi, að mati Ketils Sigurjónssonar, sérfræðings um orkumál. Hann líkir þessu við olíuhagnað Norðmanna og segir sæstreng stærsta efnahagstækifæri Íslendinga.
Norsku ríkisorkufyrirtækin Statoil og Statkraft skýrðu í vikunni frá ákvörðun sinni um að byggja upp vindmyllugarð undan ströndum Bretlands fyrir 270 milljarða króna. Bresk stjórnvöld tryggja Norðmönnum lágmarks orkuverð frá vindmyllunum, sem er þrefalt hærra en núverandi markaðsverð í Bretlandi, en með slíkum samningum vilja Bretar koma í veg fyrir orkuskort í framtíðinni.
Ketill Sigurjónsson, lögfræðingur og ráðgjafi um orkumál, segir að ef þeir bregðist ekki við núna, með því að tryggja fjárfestingar í nýjum orkuverkefnum, lendi þeir í orkuskorti. Hann telur að þetta styrkjakerfi Breta gæti gert sæstreng frá Íslandi að mjög arðsömu verkefni.
„Þetta er þvílík arðsemi að þetta væri í raun stærsta efnahagslega tækifæri Íslands. Það er ekkert ofsagt,” segir Ketill í viðtali í fréttum Stöðvar 2.
Hann segir að íslensk vatnsorka ætti að vera eftirsóknarverðari en ótrygg vindorka. Miklu áreiðanlegra væri fyrir Breta að fjárfesta í vatnsorku frá Íslandi, vatnsorkan væri tryggasti og öruggasti orkugjafinn og þar að auki endurnýjanlegur.
Hann telur líklegt að kjörin fyrir raforku um sæstreng frá Íslandi yrðu svipuð og frá norsku vindmyllunum en það myndi þó ráðast af samningum við Breta. Hann telur að verðið yrði á bilinu 150 til 200 dollarar á megavattstund. Til samanburðar sé meðalverð til stóriðju á Íslandi um 25 dollarar á megavattstundina. Þannig fengist sex til átta sinnum hærra verð fyrir orkuna um sæstreng.
„Þarna erum við að tala um tekjur sem væru að stóru leyti bara hagnaður. Þannig að til lengri tíma litið gæti þetta jafnast á við hagnaðinn sem Noregur hefur af olíuvinnslu hjá sér. Það hefur verið sýnt fram á það með góðum og skýrum hætti að þetta gæti orðið ákaflega ábatasamt fyrir Ísland,” sagði Ketill.
Tengdar fréttir
Nýta breska ríkisstyrki til að reisa vindmyllur
Vindmyllunum, sem norsku ríkisfyrirtækin Statoil og Statkraft hafa ákveðið að reisa undan ströndum Norfolk í Bretlandi, er tryggður risavaxinn ríkisstyrkur.
Norðmenn fjárfesta í vindorku í Bretlandi
Norsku ríkisfyrirtækin Statoil og Statkraft hafa ákveðið að reisa 67 vindmyllur úti fyrir ströndum Norfolk í Bretlandi.
Fjármögnun raforkusæstrengs komin á fullan skrið
Fjármögnun sæstrengs milli Íslands og Bretlands er komin á fullan skrið og er leidd af breskum fjárfestum og fyrrverandi orkumálaráðherra Bretlands. Framkvæmdastjóri viðskiptaþróunar hjá Landsvirkjun segir að beðið sé eftir samkomulagi stjórnvalda þessara landa.
Ræðir sæstreng við breskan kollega sinn
Ragnheiður Elín Árnadóttir ræðir við orkumálaráðherra Bretlands um sæstrengsverkefnið í næsta mánuði. Ráðherra vill að forræði verkefnisins færist alfarið til stjórnvalda. Vinna verkefnastjórnar Rammaáætlunar veldur henni vonbrigðum.
Vilja sæstrenginn fyrir 2020, fjárfestar mjög áhugasamir
Þróunarstjóri helsta raforkufyrirtækis Bretlands segir að sæstrengur milli Íslands og Bretlands geti verið tilbúinn innan sjö ára og hvetur stjórnvöld ríkjanna til að hefja nú þegar formlegar viðræður um verkefnið.
Óljóst hvort sæstrengur sé arðbærari en stóriðja
Hagfræðistofnun Háskóla Íslands telur óljóst hvort þjóðhagslegur ábati sé meiri af sölu raforku um sæstreng en til stóriðju.
