Smáralindin fylltist af vongóðum Frozen-stúlkum

Á sjötta þúsund manns mættu í opnar prufur sem útgáfufyrirtækin Disney og Edda USA stóðu fyrir í Smáralind í gær í tengslum við útgáfu hárgreiðslubókar sem byggir á einni vinsælustu teiknimynd allra tíma, Frozen.

Myndin hefur slegið  hvert metið á fætur öðru út um allan heim. Leitað var að stúlkum á aldrinum 6–12 ára til að verða hármódel í bókinni.

Upphaflega áttu prufur að hefjast kl. 16 og standa yfir til kl. 19 en fljótlega upp úr kl. 14 var búin að myndast biðröð á göngum Smáralindar og því var ákveðið að hefja myndatökur talsvert fyrr en ráðgert hafði verið.

„Viðbrögðin komu okkur skemmtilega á óvart og það var ótrúlega gaman að sjá allar þessar fallegu stelpur sem komu og tóku þátt,“ segir Tinna Proppé, útgáfustjóri Edda USA.

„Þar sem svo margar stúlkur komu í prufuna ráðgerum við að taka næstu tvær vikur í að fara í gegnum allar myndirnar og finna þær stúlkur sem sem verða í bókinni. Í Frozen koma ótal hárgreiðslur við sögu og bókin mun sýna hvernig hægt er að gera þær greiðslur á auðveldan og skemmtilegan máta,“ segir Theodóra Mjöll Skúladóttir Jack, höfundur bókarinnar.

Allar stúlkurnar sem mættu í prufuna í gær verða látnar vita um niðurstöðuna hvort sem þær verða valdar til að vera í bókinni eða ekki. Þá er ráðgert að myndir af hverjum og einum þátttakenda verði aðgengilegar á netinu.

Theodóra Mjöll, sem er hárgreiðslukona, hefur áður gefið út vinsælu hárgreiðslubækurnar Hárið og Lokkar og þvi verður þetta hennar þriðja bók.