Fjórir grunaðir um líkamsárás á Hvammstanga

Fjórir karlmenn voru handteknir á Hvammstanga í nótt grunaðir um líkamsárás.



Árásarmennirnir eru á öllum aldri, sá yngsti er um tvítugt en sá elsti á sextugsaldri en lögreglan á Akureyri, sem fer með rannsókn málsins vildi ekki gefa upp nánari upplýsingar að svo stöddu.

Hún staðfesti þó í samtali við Vísi að fjórir karlmenn lægju undir grun en DV greindi frá þessu fyrr í dag.

Talið er að mennirnir hafi verið í gleðskap ásamt fimmta manni í íbúð eins árásarmannanna. Heimildir blaðsins herma að hringt hafi verið á lögreglu þegar fórnarlambið var byrjað að hósta upp blóði þó nánari málavextir séu ókunnir.

Maðurinn var fluttur með sjúkrabíl á Landspítalann í Fossvogi og í kjölfarið var kallað á lögreglu. Töluvert af blóði mun hafa verið í íbúðinni þegar lögreglu bar að garði. Líðan mannsins liggur ekki fyrir að svo stöddu.

Uppfært 17:55

Lögregla var látin vita af árásinni af lækni á bráðadeild Landspítalans eftir að þangað var fluttur maður á fertugsaldri með lífshættulega áverka. Ekki var vitað hvernig áverkarnir væru til komnir, en grunur lék á að þeir væru til komnir vegna refsiverðrar háttsemi.

Í tilkynningu frá lögreglunni segir að málið heyri undir lögregluna á Akureyri samkvæmt reglum um sérstakar rannsóknardeildir.

Fjórir karlmenn hafa verið handteknir og eru nú í fangageymslum á Akureyri. Lögreglan á Akureyri segir málið enn vera á frumstigi og ekki sé hægt að greina nánar frá því á þessu stigi.

Lögreglan á Akureyri nýtur aðstoðar tæknideildar Lögreglunnar á höfuðborgarsvæðinu við rannsókn málsins. Gert er ráð fyrir að lögreglustjórinn á Akureyri muni fara fram á gæsluvarðhald yfir hinum handteknu síðar í kvöld.