„Þetta mál hefur tekið allt of langan tíma"

Stöð 2 fjallaði í gær um mál Romylynar, sem á íslenskan stjúpföður og fjölskyldu hér á landi. Útlendingastofnun synjaði beiðni hennar um dvalarleyfi í þriðja sinn í haust en nýlega sneri innanríkisráðuneytið þeim úrskurði við og er Romylyn komin til Íslands.

„Mín skoðun er sú að við megum gæta betur að skilgreiningum á fjölskyldusameiningu og því að fólk eigi rétt á að dvelja hér á landi af mannúðarástæðum,“ segir Hanna Birna Kristjánsdóttir, innanríkisráðherra. „Við höfum aðeins verið að víkka það hugtak og vinna betur með það lögfræðilega og þetta er eitt af þeim málum sem falla þarna undir. Ég vil bara óska  fjölskyldunni innilega til hamingju með að hafa fengið niðurstöðu.“

Mál Romylynar velktist um í kerfinu í átta ár og þótt það fengi flýtimeðferð í ráðuneytinu tók sjö mánuði að fella úr gildi síðustu synjun Útlendingastofnunar.

„Þetta mál hefur tekið allt of langan tíma en niðurstaðan er sem betur fer í höfn.“

Hanna Birna segir miklar breytingar standa til í innflytjendamálum

„Það er mjög mikil og ánægjuleg samstaða á þingi um að við þurfum að gera betur. Við þurfum að gæta að mannúð og málsmeðferðarhraða en við þurfum líka að sinna alþjóðlegum reglum og lögum og passa upp á að þetta sé eins vel gert og við mögulega ráðum við.“

Fjölskylda Romylynar ætlar í skaðabótamál við ríkið en Hanna Birna vill ekkert tjá sig um það.

„Ég kom ekki að málinu eða ráðuneytið undir minni stjórn fyrr en fyrir nokkrum mánuðum síðan svo ég ætla ekki að fella neina dóma um það hvers vegna málið tók svona langan tíma á fyrri stigum. Fólk á auðvitað alltaf þennan rétt; þ.e. að leita réttar síns.“

Fjölskyldan ætlar einnig í meiðyrðamál við Kristínu Völundardóttur, forstjóra Útlendingastofnunar, en hún gat ekki veitt viðtal í dag.