Allir dómarar vanhæfir

Wow air hefur kært ákvörðun áfrýjunarnefndar samkeppnismála um að félagið eigi ekki rétt á tveimur ákveðnum afgreiðslutímum á Keflavíkurflugvelli. Áfrýjunarnefndin felldi úr gildi ákvörðun Samkeppniseftirlitsins um að Wow air ætti rétt á þessum tveimur afgreiðslutímum en Skúli Mogensen forstjóri Wow air sagði að þessir ákveðnu tímar væru forsendu fyrir því að félagið geti hafið flug til Bandaríkjanna. Hættu þeir tímabundið við flug vestur um haf vegna þeirrar óvissu sem var um málið nú í upphafi árs.

Vefsíðan Túristi greinir frá því að málið hafi verið tekið fyrir í Héraðsdómi Reykjavíkur í morgun en þar sem dómsstjóri hans var skipaður til formennsku í áfrýjunarnefnd Samkeppnismála þá eru allir dómarar við réttinn vanhæfir. Dómstjóri Héraðsdóms Vestfjarða er nú með málið á sinni könnu.

Friðþór Eydal, talsmaður Isavia, segir í svari til Túrista að krafist verði frávísunar á málinu á grundvelli aðildarskorts. Hann segir að áfrýjunarnefndin hafi verið búin að taka afstöðu til þess að Wow Air ætti ekki aðild að málinu. Meðal annars vegna þess að ákvörðun Samkeppniseftirlitsins í vetur hefði verið beint að Isavia en ekki öðrum. Friðþór bendir einnig á að flugfélagið hafi ekki sótt um úthlutun afgreiðslutíma hjá samræmingarstjóra vegna tímabilsins sem ákvörðunin tók til. Svanhvít Friðriksdóttir, talsmaður Wow Air, segist ekki geta tjáð sig um þessi mál að svo stöddu.