Bankarnir hagnast óeðlilega á Seðlabankanum

Formaður efnahags- og viðskiptanefndar Alþingis segir ekki eðlilegt að viðskiptabankarnir hagnist óhóflega á áhættulausum innistæðum sínum í Seðlabankanum sem greiði þeim allt of háa vexti. Nær væri að auka bindiskyldu bankanna vilji Seðlabankinn draga úr peningamagni í umferð.

Frosti Sigurjónsson formaður efnahags- og viðskiptanefndar gagnrýnir peningamálastefnu Seðlabankans fyrir að gefa viðskiptabönkunum allt of góð kjör sem þeir hafi ekkert fyrir að afla."Seðlabankinn er að ávaxta 206 milljarða fyrir bankana á mjög háum vöxtum, nánar tiltekið 5 til 5,7 prósenta vöxtum. Þetta kostar með sama áframhaldi tíu til ellefu milljarða á ári og þetta er allt of hátt, allt of mikið,“ segir Frosti.

Bankinn gæti dregið úr þesum vaxtakostnaði sínum sem á endanum sé greiddur af skattgreiðendum. Ef Seðlabankinn vilji binda um 200 milljarða af fé viðskiptabankanna til að draga úr peningamagni í umferð geti hann hækkað bindiskylduna.

"Og borgað lægri vexti á bindiskyldureikninga, t.d. vexti sem héldu í við verðbólgu. Það er alger óþarfi að borga bönkunum svona há vexti á svo stóra upphæð,“ segir Frosti.

Núverandi fyrirkomulag dragi úr arðgreiðslugetu Seðlabankans. Þegar ríkissjóður standi eins illa og raun ber vitni verði Seðlabankinn að sýna aðhald og velja stýritæki sem séu hagstæðust á hverjum tíma. Bindiskyldan sé nú tvö prósent og óhætt ætti að vera að hækka hana í skrefum um nokkur prósent.En hefði það ekki neikvæð áhrif á stöðu bankanna sjálfra?

"Þeir myndu kannski ekki hagnast jafn mikið. En ég held að bankarnir eigi ekki að hagnast á öruggri ávöxtun sinni hjá Seðlabankanum. Það er hvergi svoleiðis í heiminum nema hér,“ segir Frosti Sigurjónsson.