Mæla með Sandberg, Branson og Þorsteini í Plain Vanilla á Instagram

Viðskiptavefurinn Business Insider mælir með því að fólk fylgist með Þorsteini Baldri Friðrikssyni, stofnanda og framkvæmdastjóra Plain Vanilla, á Instagram. Í nýbirtri grein á miðlinum mælir blaðamaður með 17 manns úr tæknigeiranum sem fólk ætti að fylgjast með á Instagram og er Þorsteinn Baldur þar í hópi með fólki eins og Sheryl Sandberg, framkvæmdastjóra Facebook, Ben Silbermann, stofnanda Pinterest, Kevin Systrom, stofnanda Instagram, Alexis Ohanian, stofnanda Reddit og milljarðamæringnum góðkunna Richard Branson.

Plain Vanilla stendur á bak við spurningaleikinn vinsæla QuizUp en greint var frá því nýlega að hann væri hraðast vaxandi app sögunnar, að mati markaðs- og tæknigreiningarfyrirtækisins Fiksu. Í byrjun mánaðarins bauðst Android-notendum í fyrsta sinn að ná í leikinn og fyrsta daginn skráðu yfir hundrað þúsund Android-notendur sig sem notendur QuizUp.

Um 150.000 manns bætast nú í hóp QuizUp notenda á degi hverjum og er búist er við að heildarnotendafjöldinn muni tvöfaldast á næstunni, enda er Android með um 79% af markaðshlutdeild á snjalltækjamarkaðinum.