Afmælissöngur og gítarspil á toppi Kilimanjaro

Vilborg Arna Gissurardóttir og félagar toppuðu Kilimanjaro, hæsta fjall Afríku, klukkan sjö í morgun að staðartíma eða tíu í morgun að íslenskum tíma.

Fjallið, sem er að finna í Tansaníu, er 5.895 metrar á hæð. Í bloggfærslu Vilborgar kemur fram að allir í hópnum hafi komist á toppinn og gangan gengið vel.  Nokkrir hafi fundið fyrir örlitlum hæðaróþægindum en það hafi ekki verið neitt til að tala um.

„Við fengum ofboðslega gott veður og það var mikil stemning í hópnum. Við tókum með okkur gítar á toppinn og sungum eitt lag á afrísku/swahili og svo tókum við afmælissönginn fyrir einn úr hópnum, hann Gunnar sem á afmæli í dag,“ segir Vilborg Arna frá á heimasíðu sinni.

Eftir að hópurinn spókaði sig um á toppnum hélt hann aftur niður í búðirnar þar sem sest var að snæðingi og gengið frá dótinu. Hópurinn er nú staddur í um 3000 metra hæð og heldur niður af fjallinu í fyrramálið.

Vilborg Arna hefur nú toppað hæsta tind hverrar heimsálfu ef frá er talin Asía. Þar gnæfir Mount Everest yfir önnur fjöll en stefnan er sett á að toppa þann hæsta í maí að því er segir í ferðadagbók Vilborgar. Takist það hefur Vilborgu tekist að klífa alla tindanna á innan við ári.