Skömmtunarhagfræði Sjálfstæðisflokksins?

Námsmenn eru mikilvægur hópur fyrir sagmfélagið, þeir eru hópurinn sem mun koma til með að byggja grunnstoðir samfélagsins fyrir framtíðina. Ungt fólk skráir sig fullt áhuga og metnaðar til náms, sest á skólabekk, les í skræðum og skilar góðu verki. En hvað gerist að skóladegi loknum? Þá þarf hinn metnaðarfulli námsmaður að fara heim og borga reikninga svona eftir að hafa tæmt út af kortinu í matarinnkaupunum á leiðinni heim. Námsmenn þurfa nefninlega líka að borða, kaupa bækur, borga húsleigu og símreikninga. Svo ekki sé talað um barnafólk sem þarf að borga leikskólagjöld, kaupa föt á börnin og annað það sem tilheyrir barnauppeldi. En þetta allt saman er svo sem ekkert óeðlilegt, fólk þarf að lifa!

Erfitt að ná endum saman

Þegar námsmaðurinn er búinn að fá útgreidda sína mánaðarlegu greiðslu frá LÍN og búinn að vinna sem nemur í hæsta lagi fyrir 62500 kr. á mánuði án þess að námslán skerðist er nánast engin leið að klífa reikningamúrinn. Þegar þessar upphæðir hafa verið lagðar saman á námsmaðurinn, svo mjög vægt sé til orða tekið, erfitt með að ná endum saman. Skömmtunarhagfræði Lánasjóðsins þar sem námsmönnum eru skammtaðir peningar með barnshnefa er algerlega gjaldþrota. Ekki er um að ræða bætur eða beina framfærslu frá ríkinu heldur lán sem greidd eru til baka og þau eru greidd til baka þó vextir séu niðurgreiddir af ríkissjóði. Hækkun frítekjumarks námslána er sennilega sú leið sem er hvað einföldust til þess að bæta kjör námsmanna verulega. Leyfum námsmönnum að vinna og bjarga sér sjálfir!

Mun Illugi skoða málið?

Seint verður hægt að trúa því að Sjálfstæðisflokkurinn muni vilja leggja nafn sitt við skömmtunarhagfræði af þessu tagi. En þar liggur valdið nú í dag, sá ágæti maður Illugi Gunnarsson fer með þann málaflokk sem viðkemur LÍN getur ekki verið þekktur fyrir að styðja slíka vegferð. Ekki væri það í anda stefnu Sjálfstæðismanna að vera á móti því að fólk bjargi sér sjálft og vinni fyrir launum með heiðarlegum hætti. Ekki væri það í anda Sjálfstæðisflokksins að ýta undir svarta atvinnustarfsemi vegna þess að námsmenn eru að reyna að bjarga sér og komast á sama tíma hjá því að skerða námslán sín. Því vil ég treysta og trúa því að menntamálaráðherra leggi það til við stjórn LÍN við endurskoðun útlánareglan Lánasjóðsins að frítekjumark námslána verði hækkað verulega án þess að skerða önnur réttindi námsmanna. Þannig að námsmenn þurfi ekki að hokra með sultardropann í nefinu á næstu árum á sama tíma og við viljum stæra okkur af velferð og góðum aðbúnaði námsmanna í hvívetna.