Stefnir í næstverstu loðnuvertíð í ára raðir

Þjóðarbúið verður af tugum milljarða vegna slæmrar loðnuvertíðar. Allt stefnir í að loðnuvertíðin í ár verði sú næstversta í hartnær tvo áratugi. Útgerðarmenn eru svekktir en vona þó það besta.

Aflaverðmæti loðnuvertíðarinnar árið 2013 var um 33 milljarðar króna. Útgerðarmenn vonast þó til að hægt verði að bjarga vertíðinni í ár og afla um 10 milljarða í ár eða 23 milljörðum minna en á síðasta ári.

Loðnukvótinn í ár er innan við fimmtungur af því sem hann var á síðasta ári. Kvóti til loðnuveiða er 85 þúsund tonn í ár en var 454 þúsund tonn á síðasta ári. Mælingar Hafrannsóknarstofnunar á loðnustofninum benda ekki til þess að kvótinn verði aukinn á þessari vertíð. Það stefnir því í næstverstu loðnuvertíð síðari ára með tilheyrandi samdrætti í tekjum fyrir þjóðarbúið.

Vonast til að fá kvóta Norðmanna

Norðmenn ná líklega ekki að klára sinn kvóta í íslenskri lögsögu. Þar bætast líklega við 40 þúsund tonn í kvóta íslenskra útgerða.

„Þetta verður aldrei góð vertíð ef við miðum við nokkur ár aftur í tímann. Ef við fáum þessa viðbót sem að Norðmenn hafa ekki veitt þá ættum við að geta náð að fara yfir 10 milljarða í aflaverðmæti,“ segir Ingimundur Ingimundarson, útgerðarstjóri uppsjávarskipa hjá HB Granda.

Nánar er fjallað um málið í kvöldfréttum Stöðvar 2 sem sjá má í myndbandinu hér að ofan.