Kristján og Leó kaupa fyrr­verandi höfuð­stöðvar Lands­virkjunar

Húseignin er 4.555 fermetrar eða um 56 prósent af skráðri stærð alls hússins. Greint var frá því í sumar að sex tilboð hefðu borist í húsið eftir að það var sett á sölu í apríl. Fyrirtækjaráðgjöf Kviku banka hafði umsjón með söluferlinu.

Í tilkynningu segir um Landsbyggð að það sé fasteigna- og þróunarfélag sem sérhæfir sig í uppbyggingar- og umbreytingarverkefnum um allt land og hefur meðal annars staðið að uppbyggingunni í miðbæ Selfoss í gegnum dótturfélagið Sigtún þróunarfélag ehf. Félagið keypti í júlí á þessu ári gömlu höfuðstöðvar Landsbankans við Austurstræti 11 í Reykjavík og vinnur nú að áætlunum um nýtingu þess.

Landsbyggð ehf. er í eigu Kristjáns Vilhelmssonar, sem kenndur er við Samherja, og Leós Árnasonar. Í umfjöllun Vísis um kaupin í sumar kom fram að gömlu höfuðstöðvar Landsbankans væri þriðja fyrrverandi bankaútibúið sem félög tengd Kristjáni kaupir af Landsbankanum.

Sjá einnig: Kristján í Samherja keypti Landsbankahúsið á 350 milljónir

„Við sjáum fram á að nýta þetta hús á fjölbreyttan og metnaðarfullan hátt. Staðsetningin er frábær, miðsvæðis á höfuðborgarsvæðinu og nálægt helstu samgönguæðum. Við teljum að húsið geti orðið fyrsta flokks atvinnuhúsnæði þar sem fara saman skrifstofu-, þjónustu- og verslunarrými,“ segir Guðjón Auðunsson, stjórnarformaður Landsbyggðar ehf., í tilkynningu.

Landsvirkjun var í hálfa öld til húsa á Háaleitisbrautinni en flutti höfuðstöðvar sína í fyrra í kjölfar þess að mygla fannst í húsnæðinu árið 2022. Í sameiginlegri tilkynningu frá Landsvirkjun og Landsbyggð kemur fram að húsnæðið hafi ekki þótt hentugt fyrir áframhaldandi starfsemi og að stjórn hafi því samþykkt í júní í fyrra að selja húsið. Landsvirkjun er nú með höfuðstöðvar sínar í Katrínartúni og verður með aðsetur þar til nýjar höfuðstöðvar verða tilbúnar. Þær er áformað að reisa austast á Bústaðavegi í Reykjavík, þar sem Landsvirkjun keypti lóðir í febrúar síðastliðnum.

„Við hjá Landsvirkjun fögnum því að gömlu höfuðstöðvarnar okkar séu komnar í hendur nýrra eigenda sem hafa mikla reynslu af uppbyggingar- og umbreytingaverkefnum. Það fór vel um okkur áratugum saman á þessum einstaka útsýnisstað í miðri borginni með góðum grönnum. Við einbeitum okkur núna að því að undirbúa byggingu nýrra höfuðstöðva. Það mál er komið á rekspöl þótt endanlegar ákvarðanir um uppbyggingu liggi ekki fyrir,“ segir Rafnar Lárusson, framkvæmdastjóri fjármála og upplýsingatækni hjá Landsvirkjun, um söluna í tilkynningu.