„Gríðarlegur heiður fyrir tossa þessa lands“

Þátturinn Tossarnir, í umsjón sjóvarpskonunnar Lóu Pind Aldísardóttur, var í dag tilnefndur til Edduverðlaunanna  sem besti frétta- eða viðtalsþátturinn.

Aðrir þættir sem voru einnig tilnefndir voru Auðæfi hafsins, Ísþjóðin 3, Kastljós og Málið.

Tossarnir fjalla meðal annars um aðila sem urðu fyrir barðinu á skólakerfinu, fundu sig ekki og flosnuðu upp úr námi. Farið var í saumana á því hvað væri í raun að menntakerfi Íslendinga.

„Þetta er gríðarlegur heiður fyrir tossa þessa lands að fá þessa tilnefningu,“ segir Lóa Pind í samtali við Vísi.

„Ég vona sannarlega að þetta verði til þess að vekja enn meiri athygli á þeim vanköntum sem eru í skólunum okkar sem valda því að mörg hundruð nemendur flosna upp úr námi á hverju ári.“

„Ég fékk gríðarleg viðbrögð við þessum þáttum og hef í raun aldrei fengið eins sterk viðbrögð við nokkru sem ég hef gert í sjónvarpi.  Það hafði fjöldi fyrrverandi tossa, núverandi tossa og foreldrar samband við mig. Sumir þeirra töldu sig í fyrsta sinn fá uppreisnaræru eftir þessa umfjöllun.“

„Þessi mál voru til umræðu síðar hjá mér í þættinum Stóru Málin í vor þegar ég ræddi við menntamálaráðherra og borgarstjóra,“ segir Lóa en hægt er að horfa á þann þátt Stóru málanna hér.

Hér að ofan má sjá fyrsta þáttinn af Tossunum sem sýndur var á Stöð 2.

Einnig var fjallað um þáttinn í Ísland í dag sem sjá má hér á sjónvarpsvef Vísis.