Yngsti bæjarlistamaður Seltjarnarness frá upphafi

Ari Bragi Kárason, trompetleikari, var í dag útnefndur bæjarlistamaður Seltjarnarness 2014 og er hann langyngsti Seltirningurinn til að hljóta þessa nafnbót. Ari er aðeins 24 ára gamall og var snemma áberandi í íslensku tónlistarlífi. Níu ára gamall hlaut hann hvatningarverðlaun ungra og efnilegra Íslendinga frá forseta Íslands og var Ari valinn bjartasta vonin á Íslensku tónlistarverðlaununum árið 2011.

„Ég hef alltaf verið eldri sál og umgengist eldra fólk frá því að ég man eftir mér,“ segir Ari sem er stoltur af því að hljóta þessa nafnbót. „Ég lít á þetta sem heiður og tækifæri. Ég kippi mér ekki upp við það hvað aðrir bæjarlistamenn hafi verið eldri en ég eða ég yngri.“

Unnið með Noruh Jones

Ari hefur unnið til fjölda verðlauna og starfað með þekktum erlendum tónlistarmönnum. Ari hefur meðal annars leikið inn á hljómplötu hjá Noruh Jones auk þess að vera afkastamikill hér heima á Íslandi. Hann stefnir á útgáfu hljómplötu í sumar í samstarfi við Eyþór Gunnarsson píanóleikara. Hann hrósar öflugu tónlistarlífi á Seltjarnarnesi

„Tónlistarskólinn er algjör drifkraftur í samfélaginu og það er mjög öflugt starf sem fer fram á Seltjarnarnesi. Ég er algjörlega afurð þess,“ segir Ari Bragi.

Framúrskarandi tónlistar- og íþróttamaður

Ara er margt til lista lagt. Hann er með hæfileikaríkustu tónlistarmönnum landsins en er að auki framúrskarandi íþróttamaður. Hann hleypur 100 metra spretthlaup á rétt rúmum 11 sekúndum auk þess að hafa orðið Íslandsmeistari í ólympískum lyftingum og róðri.

„Það er gott að hafa eitthvað á móti og gaman að spreyta sig á öðrum sviðum.“