Fíklar ekki glæpamenn

Píratar boðuðu þingsályktunartillögu um fíkniefnamál á alþingi í óundirbúnum fyrirspurnartíma nú fyrir stundu. Fram kom sú skoðun Kristjáns Þórs Júlíussonar heilbrigðisráðherra að hann liti ekki á fíkla sem glæpamenn. „Þetta er þarft umræðuefni sem kallar á, alvarlega og yfirvegaða umræðu,“ sagði Kristján í svari til Jóns Þórs Ólafssonar Pírata. „Það getur ekki verið markmið yfirvalda að refsa þeim sem eru svo ógæfusamir að lenda í krumlunum á fíkniefnum. Hlýtur að vera hlutverk kerfisins að koma þeim til aðstoðar. Heilbrigðisyfirvöld, og raunar flest það góða fólk sem starfar innan þess kerfis, lítur ekki á þetta fólk sem glæpamenn,“ sagði ráðherra sem boðaði að fyrir lægi aðgerðaráætlun til tveggja ára.

Jón Þór Ólafsson hóf fyrirspurn sína á tilvitnun í Kofi Annan, fyrrverandi aðalritara Sameinuðu þjóðanna, sem hefur sagt eitthvað á þá leið að eiturlyf hafi eyðilagt líf margra en röng stefna stjórnvalda hafi eyðilagt enn fleiri. Hann taldi það gleðiefni að boðuð hafi verið ný stefna en telur mikið vanta uppá samstillt úrræði þeirra sem að málum koma sem miði að því að minnka eftirspurnina. „Við verðum að hætta að gera fíkla að glæpamönnum.“