Samspil ljóss og myrkurs verður þemað á Vetrarhátíðinni

Samspil ljóss og myrkurs verður fyrirferðamikið á Vetrarhátíð sem haldin verður í Reykjavík 6.-15. febrúar.

Markmið hátíðarinnar er að lýsa upp mesta skammdegið í febrúar með viðburðum og uppákomum af ýmsu tagi, stórum sem smáum en yfirskrift hátíðarinnar er Magnað myrkur.

Dagskráin verður að þessu sinni einkar glæsileg en fjöldi listamanna mun taka þátt í að skapa einstaka stemningu í borginni. Ljósalistaverk eftir innlenda og erlenda listamenn verða tendruð og ljósaviðburðir munu eiga sér stað um alla borg og verða byggingar og almenningsrými lýst upp með fjölbreyttum hætti.

Meginstoðir Vetrarhátíðar 2014 verða Safnanótt, Sundlauganótt og ljósalistaverk með skýrri tengingu við ljós og myrkur. Aðrir skemmtilegir viðburðir hátíðarinnar eru tónleikarnir Denver Calling Reykjavík, snjóskurður, heimsdagur barna og ráðstefna.

Hátíðin verður sett í Hljómskálagarðinum fimmtudaginn 6. febrúar kl. 19.30. Opnunaratriðið verður verk eftir Circle 6 sem býður áhorfanda að rannsaka samband ljóss og hreyfingar. Áhorfendur verða virkir þátttakendur í sjónarspili verksins sem er óskilgreint, opið og teygjanleg víxlverkun rýmis og skúlptúrs.

Circle 6 eru listamennirnir Inuk Silis Høegh (Grænlandi/Danmörku), Arild M. Kalseth (Noregi), and Amelie Deschamps (Frakklandi/Kanada).

Af nógu verður að taka á þessum dimmu vetrardögum þar sem magnað myrkur fær að njóta sín í Reykjavík og munum við leika okkur að andstæðum ljóss og myrkurs á Vetrarhátíð.