Aðalskipulagi Reykjavíkur hafnað vegna Vatnsmýrar

Skipulagsstofnun hafnaði í dag að staðfesta nýtt aðalskipulag Reykjavíkur nema settur yrði inn fyrirvari um Vatnsmýri. Fyrirvarinn kemur í veg fyrir íbúðabyggð á svæðinu fyrr en samkomulag hefur náðst við ríkið um framtíð flugvallarstarfsemi.

Borgarstjórn samþykkti nýja aðalskipulagið fyrir tveimur mánuðum. Í dag sendi  Skipulagsstofnun það til baka í Ráðhúsið. „Það er okkar niðurstaða í því máli að við getum ekki staðfest það, eins og það liggur fyrir núna,” segir Ásdís Hlökk Theodórsdóttir, forstjóri Skipulagsstofnunar, í samtali við Stöð 2.

Skipulagsstofnun gerir athugasemdir við nokkra þætti, sá stærsti lýtur að Vatnsmýri og vill stofnunin að settur verði inn samsvarandi fyrirvari og var í fyrra skipulagi; að tímasetning uppbyggingar sé háð ákvörðun samgönguyfirvalda í landinu um flutning flugstarfsemi.

„Þegar fyrirvari af þessu tagi er á þá þýðir það í raun að það eru þá á ákveðin stopp í gangi á að það sé hægt að halda áfram með málið yfir á næsta skipulagsstig; að það sé hægt að ganga frá deiliskipulagi og að hægt sé að fara í leyfisveitingar,” segir Ásdís Hlökk.

En þýðir þetta í raun að borgin getur ekki ein lagt niður flugvöllinn heldur þarf að semja um það við ríkið?

„Það hefur verið litið svo á, já. Það var litið svo á þegar aðalskipulagið kom til staðfestingar á sínum tíma árið 2002 og það er litið á það með sama hætti í dag frá okkar hálfu, já.”

Eigendur einka- og kennsluflugvéla, sem borgin vill burt strax á næsta ári, geta andað léttar, miðað við túlkun Skipulagsstofnunar.

„Tímasetning á færslu kennslu- og einkaflugsins hvílir í rauninni á því að samgönguyfirvöld á landsvísu, það er að segja innanríkisráðuneytið og ISAVIA, finni lausn á því máli annarsstaðar þannig að það sé hægt að koma þeirri starfsemi fyrir annarsstaðar.”

Ásdís Hlökk segir að Skipulagsstofnun muni á næstu dögum eiga samtal við borgina um þetta mál og hvort stofnunin og borgin geti ekki litið á það sömu augum, enda sé það mjög æskilegt.

„En ef borgin lítur svo á að þarna sé ekki tilefni til neinna fyrirvara þá tel ég að Skipulagsstofnun beri að vísa þessu máli áfram til umhverfis- og auðlindaráðherra. Það sé þá ráðherra sem ákveði hvernig á því verði tekið.”