Útvarpsstjarna með heilahristing

Útvarpsmaðurinn Sigurjón M. Egilsson datt illa í hálkunni í morgun og fékk við það vægan heilahristing. Hann segist ekki skilja hvers vegna ekki er hægt að koma af stað góðum hálkuvörnum.

„Ég var á morgungöngu með hundinn minn í Mosó,“ segir Sigurjón í samtali við Vísi. „Þetta var nú bara vægur heilahristingur en það varð að loka sárinu með saumum. Blæddi lifandis býsn úr þessu. En slysó er að taka á móti bunkum af svona fólki, það held ég að sé stóra málið í þessu.“

Sigurjón segist sjálfur vera búinn að detta yfir tíu sinnum í hálkunni í vetur, og þá bæði með mannbrodda og án þeirra. Hann var ekki með broddana þegar hann datt í morgun.

Á dögunum skoraði Sigurjón á bæjarfulltrúa í Mosfellsbæ á Facebook-síðu sinni og vildi að þeir kepptu í því að komast ákveðna vegalengd í hálkunni á sem stystum tíma án þess að detta.

„Þetta var nú bara létt spaug. Það átti að vera refsistig fyrir að hrasa og detta. Bæjarstjórinn svaraði mér nú og sagðist taka áskoruninni. Hann ætti svo góða mannbrodda. En ráðaleysi fólks gagnvart hálkunni er mikið. Það kostar örugglega meira að hlúa að okkur sem meiðum okkur en að vinna gegn hálkunni.“

Vísir hafði samband við slysadeild til að spyrjast fyrir um tíðni hálkuslysa undanfarið. Enginn hafði tíma til að tala við fréttamann, svo mikið var að gera.