Fjallað um gosið í Eyjafjallajökli í 60 mínútum

„Við gengum saman á jökulinn í nokkur skipti til að skýra jarðfræðina að baki gosinu sem þá stóð yfir. Við fórum upp á gígbrún og það verður forvitnilegt að sjá frásögn þessa virta fréttamanns,“ segir Haraldur Sigurðsson eldfjallafræðingur um umfjöllun 60 Minutes um Eyjafjallajökulsgosið sem verður frumsýnd á CBS-sjónvarpsstöðinni annað kvöld, og viku síðar á Stöð 2.

Í umfjöllun 60 Minutes um eldgosið í Eyjafjallajökli fylgdi Haraldur tökuliði um jökulinn og útskýrði framvindu gossins sem hófst 14. apríl 2010 og stóð til 23. maí. Til stóð að fjalla um gosið strax við heimkomu til Bandaríkjanna, en það hefur dregist til þessa dags af ástæðum sem Haraldi eru ekki kunnar.

Haraldur segir að Pelley hafi verið helst forvitinn um samspilið í náttúrunni; af hverju eldgos verða og hvað er svo sérstakt við Ísland í því samhengi. „Hann hafði líka áhuga á áhrifum á flugsamgöngur, sem allir muna eftir. Þá fórum við inn á það að 313 flugvöllum var lokað í Evrópu – að ástæðulausu að mínu viti,“ segir Haraldur.

Vart þarf að kynna fréttaskýringaþáttinn 60 mínútur fyrir landsmönnum, eða Scott Pelley sem Haraldur ber vel söguna. Pelley er að hans sögn mikill séntilmaður og fagmaður sem gaman hafi verið að kynnast. „Hann er mjög elskulegur, og heiðursmaður vil ég segja. Hann er mjög duglegur, íþróttamaður sem er farinn í líkamsrækt löngu áður en aðrir vakna. Afar þægilegur í allri umgengni en við vorum saman í nokkra daga á jöklinum og næsta nágrenni.“

Haraldur lýsir því að tökuliðið var á Gígjökli þegar mikið krapahlaup braust þar fram – og þess vegna hættusvæði. „Það truflaði Scott ekki neitt og hann arkaði þar á undan öllum, inn á hættusvæðið. Það gekk allt vel enda er þessi maður búinn að fara víða og leggja líf sitt að veði í sínum fréttaflutningi,“ segir Haraldur.

Þess má geta að Pelley til aðstoðar var ásamt fleirum þingkona Sjálfstæðisflokksins, Elín Hirst. Hún vann ásamt framleiðandanum Rebeccu Peterson dag og nótt við undirbúning áður en upptakan á jöklinum hófst. Tæknimenn sem unnu við upptökuna voru alls tíu og frábært lið í alla staði, að sögn Haraldar.