Blöskrar ástandið við Gullfoss

Friðriki Brekkan, leiðsögumanni blöskrar ástandið við Gullfoss en þar fór stór vörubíll  á vegum Umhverfisstofnunar í gær til að sanda vegna hálku en á sama tíma brotnuðu margra milljóna króna timburstígar undan þunga bílsins. Friðrik íhugar að leggja fram kæru til lögreglunnar á Selfossi á hendur Umhverfisstofnunar.

Þrátt fyrir að það sé hávetur á Íslandi er ekkert lát á erlendum ferðamönnum sem heimsækja helstu náttúruperlur landsins. Mikil hálka er víða og því er reynt að dreifa sandi á fjölmennustu ferðamannastaðina eins og við Gullfoss. Friðrik Brekkan, segir þó mikið fát á þessum vinnubrögðum og algjör tilviljun hvar sandinum er dreift og hvar ekki.

Friðrik segir leiðsögumenn mjög pirraða yfir ástandinu á ferðamannastöðum þegar horft er til hálkuvarna enda hafi fjölmargir brotnað á stórum svellbunkum síðustu vikur eins og við Gullfoss.