Utanríkisráðherra staðfestir þvingunaraðgerðir

Gunnar Bragi Sveinsson utanríkisráðherra staðfesti í dag þvingunaraðgerðir gegn rússneskum og úkraínskum einstaklingum sem tengjast aðgerðum Rússa á Krímskaga.

„Í ljósi þeirrar stöðu sem upp er komin á Krímskaga ákváðu EFTA-ríkin 18. mars að slá á frest frekari viðræðum við tollabandalag Rússlands, Belarú (Hvíta-Rússlands) og Kasakstan um fríverslun, “ segir í tilkynningu frá utanríkisráðuneytinu.

Þá segir einnig að utanríkisráðherra fordæmi innlimun Rússlands á Krím og ítreki fyrri yfirlýsingar sínar um ólögmæti atkvæðagreiðslunnar sem fram fór þann 16. mars um að Krímskagi skyldi verða hluti af Rússlandi.