Tilnefndur til færeysku tónlistarverðlaunanna

„Þetta er æðislegt. Mér finnst ótrúlega gaman að vera tilnefndur. Það er mikill heiður,“ segir tónlistarmaðurinn Svavar Knútur. Hann er tilnefndur, ásamt færeyska tónlistarmanninum Marius, fyrir lag ársins 2013 á færeysku tónlistarverðlaununum, Faroe Music Awards, sem veitt eru í fyrsta sinn núna á laugardaginn. Lagið heitir Tokan og hefur verið afar vinsælt í Færeyjum.

„Við kynntumst í söngvaskáldasmiðju á Sámsey í Danmörku en okkur var báðum boðið í hana af hátíðinni Copenhagen Songwriting Festival. Við vorum settir saman í að semja lag og ákváðum að gera lag sem sameinar íslenska og færeyska reynslu, upplifun og sýn. Lagið var samið bæði á íslensku og færeysku og sungið á báðum tungumálum til skiptis. Við tókum upp tvær útgáfur af laginu, hans útgáfu og mína. Mín útgáfa er kammerútgáfa og hans meira rokk og elektróník. Hans útgáfa fór í útvarp en við gerðum myndband við mína útgáfu,“ segir Svavar Knútur sem hefur aldrei verið tilnefndur til íslensku tónlistarverðlaunanna.

„Nei, ég er ekki töff á Íslandi.“

Tónlistarmaðurinn getur ekki verið viðstaddur hátíðina á laugardaginn þar sem hann flýgur til Þýskalands á sunnudag á tónleikaferðalag í tvo og hálfan mánuð. Hann yfirgefur samt ekki Ísland án þess að kveðja landsmenn.

„Ég verð með kveðjutónleika í kvöld á Rosenberg. Ég verð með hljómsveit í fyrsta sinn í mörg ár og ætla að flytja alls konar efni.“

)