Afmælinu fagnað með nýju kaffihúsi

Te & kaffi stendur á miklum tímamótum í ár og fagnar hvorki meira né minna en þrjátíu ára afmæli sínu. Af því tilefni opnaði fyrirtækið sitt tíunda kaffihús í Borgartúni 21a. „Við erum mjög stolt af nýja kaffihúsinu, það er mjög rúmgott og aðgengið er frábært,“ segir Halldór Guðmundsson framkvæmdastjóri kaffihúsanna.

Hann segir mikinn umgang vera á svæðinu í kring um nýja kaffihúsið. „Þetta er stórt vinnusvæði en við erum þó með mikið af bílastæðum. Þetta er klárlega aðgengilegasta kaffihúsið í bænum um helgar,“ segir Halldór glaðbeittur.

Þar er góð aðstaða fyrir til dæmis hópa sem vilja sitja í góðu umhverfi en nýja kaffihúsið er opið til klukkan 23.00 á fimmtudagskvöldum.

Hann segir kaffimenningu Íslendinga hafa breyst mikið á undanförnum árum. „Þetta byrjaði að breytast upp úr aldamótum. Í dag er kaffi latte vinsælasti kaffidrykkurinn.“ Hann segir einnig að vinsældir drykkjanna fari mikið eftir árstíðum.

„Köldu kaffidrykkirnir eru vinsælli á sumrin,“ bætir Halldór við.

Nýja kaffihúsið hefur talsverða sérstöðu og er óvenju háþróað því þar verður uppáhellibar, tebar og landsins mesta úrval af hágæða tei í lausu. „Við ætlum að bjóða upp á „afternoon tea“ þar bráðlega,“ bætir Halldór við.

Vinsælasta útibú Tes & kaffis er á Laugavegi en einnig er Te & kaffi í Eymundsson á Skólavörðustíg og á Akureyri vinsælir staðir.

Halldór segir að mikið sé á döfinni hjá fyrirtækinu á afmælisárinu. „Við ætlum að gera margt skemmtilegt í ár og er nýja kaffihúsið í Borgartúni bara byrjunin. Við erum í stöðugri vöruþróun og erum alltaf að bæta þjónustuna okkar.“