Landsbankinn á svörtum lista að ósekju

„Við fögnum verðlagseftirliti ASÍ og kveinkum okkur ekki undan gagnrýni þegar hún á við. Þegar kemur að Svarta listanum teljum við okkur vera á honum að ósekju, enda eru okkar gjöld lægri en annarra þegar kemur að vörsluþjónustu,“ segir Kristján Kristjánsson, upplýsingafulltrúi Landsbankans. Vísar hann þar til þess að Landsbankinn er á lista ASÍ yfir fyrirtæki sem hafa hækkað verð í kjölfar kjarasamninga.

„Þeir sem setja efni á margnefnda síðu nefna m.a. að Landsbankinn hafi hækkað gjöld fyrir greiðsluþjónustu. Þeir þurfa að vanda sig betur. Sú hækkun er meira en eins árs gömul,“ segir  Kristján. Þó sé rétt að vörslugjöld hafi hækkað hjá Landsbankanum, en nauðsynlegt sé að hafa nokkur atriði í huga.

Það fyrsta er að gjaldskráin taki mið af kostnaði sem er að mestu kostnaður þriðja aðila, það er Verðbréfaskráningu Íslands varðandi innlend verðbréf og að upphæð gjaldsins ráðist að stærstum hluta af því.

Þá sé bankinn með lægstu gjaldskránna á þessu sviði, fyrir og eftir þá hækkun sem hér sé til umræðu. Hann segir einnig að tæplega 90 prósent vörsluþjónustunnar sé fyrir fagfjárfesta og að sá hluti vegi ekki inn í neysluverðsvísitöluna. „Í heild vega þjónustugjöld fjármálafyrirtækja til einstaklinga 0,3 prósent í vísitölu neysluverðs og gjöld vegna vörsluþjónustu eru mjög lítill hluti af því, eða um 0,1 prósent af 0,3 prósentum í tilfelli Landsbankans. Áhrif hækkunarinnar á vísitölu neysluverðs eru því hverfandi.“

Hann segir það vera vaxandi kröfu og í samræmi við samkeppnisrétt að þeir sem njóti þjónustu greiði fyrir hana, í þessu tilfelli séu það fjárfestar. „Það er erfitt að réttlæta það að bankinn sé að borga með þjónustu sem þessari.   Þetta er því skref í þá átt að gera verðlagningu á þjónustu gagnsæja og í samræmi við eðlilega viðskiptahætti.“