Kristinn Hrafnsson varar vini sína við njósnum

„Ég er einfaldlega að vekja athygli á þeirri aðferðafræði sem er notuð – sum sé að safna upplýsingum þrjú hopp frá viðkomandi,“ segir Kristinn Hrafnsson talsmaður Wikileaks.

Kristinn hefur sent út viðvörun til Facebookvina sinna. Þar bendir hann á að ef bandaríska þjóðaröryggisstofnunin (NSA) vill safna upplýsingum um tiltekinn einstakling telur hún sér heimilt að gera slíkt hið sama um tengslanet viðkomandi allt að þremur skrefum frá honum.

„Þetta þýðir t.d. að ef NSA hefur ákveðið að njósna um mig getur það falið í sér njósnir um alla mína fésbókarvini, alla þá vini sem þeir eiga og jafnframt vini þeirra. Aðeins eitt slíkt dæmi þýðir því í reynd að allir Íslendingar gætu verið fórnarlömb slíkra njósna.“

Kristinn segir í samtali við Vísi að þetta þýði, samkvæmt mati Guardian, „að yfir milljón einstaklingar eru undir, ef einn lendir í sigtinu.“

Spurður um hvort hann telji sig sæta eftirliti eða njósnum af hálfu NSA segir Kristinn enga staðfestingu hafa á því. „En geri bara ráð fyrir því. Það er enn í gangi sakarannsókn gegn Wikileaks. Langt er síðan að ástralskir diplómatar höfðu það eftir heimildum sínum í Washington að þetta væri ein viðamesta sakarannsókn á síðari tímum.“

Kristinn bendir að endingu á að The Guardian hafi tekið saman myndræna útfærslu á hvað uppljóstranir Edwards Snowden þýði í raun fyrir hvern og einn. Þá samantekt má finna hér.