Gera kvikmynd eftir Húsi Stefáns Mána

„Ég treysti þessum mönnum fullkomlega fyrir verkinu enda hoknir af reynslu,“ segir rithöfundurinn Stefán Máni Sigþórsson sem hefur skrifað undir samning við RVK Studios um kvikmyndaréttinn að skáldsögunni Húsið sem kom út á síðasta ári.



RVK Studios er nýtt framleiðslufyrirtæki sem er stofnað af Baltasar Kormáki, Magnúsi Viðari Sigurðssyni og Sigurjóni Kjartanssyni.

Þeir eru meðal annars framleiðendur nýrra teiknimyndaþátta Hugleiks Dagssonar sem verða frumsýndir á RÚV í haust ásamt því að halda utan um framleiðslu á sjónvarpsþáttaseríunni Ófærð, sem verður stærsta og dýrasta sjónvarpsframleiðsluverkefni á Íslandi hingað til.



Húsið yrði önnur skáldsagan eftir Stefán Mána sem ratar á hvíta tjaldið en Svartur á leik var sýnd á síðasta ári við góðan orðstír. Stefán segir þá vera að stefna á árið 2015 fyrir Húsið og jafnvel sjónvarpsþætti í kjölfarið.



„Það er mikilvægt í svona samningaviðræðum að velja rétta fólkið og mér leist vel á þá. Það tók Svartan á leik sjö ár að komast á hvíta tjaldið,“ segir Stefán Máni en Sigurjón mun sjá um að skrifa handritið að verkinu.

„Sigurjón er með mjög sterka sýn á verkið og kappsfullur um að gera þetta vel.“



Stefán fær að vera með puttana í verkinu, lesa handritið yfir og koma með sínar skoðanir.

„Svo finnst mér gaman að fylgjast með á tökustað. Gerði það síðast þegar ég gat. Það er líf og fjör enda getur verið einmanalegt að vera alltaf heima fyrir framan tölvuna.“

Framhald í bígerð

Stefán Máni er þessa dagana að vinna í nýrri bók sem á að koma út í haust.

Um er að ræða glæpasögu sem verður eins konar framhald af Húsinu.

„Maður verður að halda þessu gangandi enda lifibrauðið. Þessi bók verður þó ekki með offituvandamál eins og Húsið. Hún verður nær bókinni Skipið að lengd,“ segir Stefán Máni.